गुल्मीमा स्कार्पियो सडकबाट २५० मिटर तल खस्दा ६ जनाको मृत्यु, तीन घाइते

गुल्मी, अक्टोबर २७, २०२६ — गुल्मीको कालीगण्डकी गाउँपालिका–२ दबौखानीस्थित कालीगण्डकी करिडोर सडकबाट स्कार्पियो गाडी करिब २५० मिटर तल खस्दा ६ जनाको मृत्यु भएको छ भने तीन जना घाइते भएका छन्। दुर्घटना सोमबार अपराह्न करिब ४ बजे भएको प्रहरीले जनाएको छ।

स्याङ्जाको चिरकोटबाट गुल्मीको राक्सेतर्फ जाँदै गरेको बा ०२२० नम्बरको स्कार्पियो दुर्घटनामा परेको हो।

प्रहरीका अनुसार दुर्घटनामा पाँच जनाको घटनास्थलमै मृत्यु भएको थियो। घाइते निता बगालेको स्याङ्जाको मिर्मिस्थित कालीगण्डकी सामुदायिक अस्पतालमा उपचारका क्रममा मृत्यु भएको हो।

मृत्यु हुनेमा स्कार्पियो चालक स्याङ्जाको वालिङ नगरपालिका–२ का ६७ वर्षीय दिलीपकुमार बगाले, वालिङ–१० का शिव पराजुली तथा गुल्मीको कालीगण्डकी गाउँपालिका–१ सिरकोटका लोकनाथ पाण्डे, सीता पाण्डे र कुलानन्द पाण्डे रहेका छन्। घटनास्थलमै मृत्यु भएका अर्का एक जनाको पहिचान पुष्टि हुन बाँकी रहेको प्रहरीले जनाएको छ।

दुर्घटनामा घाइते तीन जनालाई विभिन्न अस्पतालमा उपचारका लागि पठाइएको छ। घाइते छविलाल पाण्डेको अवस्था गम्भीर रहेको छ भने गोमता पाण्डे र बालकृष्ण सुवेदीको अवस्था मध्यम रहेको प्रहरीले जनाएको छ।

दुर्घटनाको जानकारी पाएपछि प्रहरी चौकी पुर्तिघाट, इलाका प्रहरी कार्यालय रिडी र जिल्ला प्रहरी कार्यालय गुल्मीबाट प्रहरी टोली उद्धारका लागि खटिएको थियो।