जाजरकोटमा कोदालो प्रहारबाट ४० वर्षीय भबिराम थापाको मृत्यु, आरोपित फरार

जाजरकोट, नोभेम्बर ४, २०२६ — जाजरकोटको जुनीचाँदे गाउँपालिकामा मंगलबार साँझ कोदालो प्रहारबाट ४० वर्षीय एक पुरुषको मृत्यु भएको छ।

मृत्यु हुनेमा जुनीचाँदे गाउँपालिका–८ पोखरीका ३० वर्षीय बले थापाका जेठोबुबाका छोरा भबिराम थापा रहेका छन्। बलेले भबिराममाथि कोदालो प्रहार गरेको प्रहरीले जनाएको छ।

जिल्ला प्रहरी कार्यालय जाजरकोटका प्रहरी नायब उपरीक्षक बुद्धिसागर पुरीका अनुसार गम्भीर घाइते भएका भबिरामको उपचार हुन नपाउँदै मृत्यु भएको हो।

प्रहरीका अनुसार घटना मंगलबार साँझ जुनीचाँदे गाउँपालिका–८ पंकस्थित बाटोमा भएको थियो।

घटनाबारे जानकारी पाएपछि प्रहरी सहायक निरीक्षक तिलक चन्दको कमान्डमा सात जनाको प्रहरी टोली घटनास्थल पुगेको थियो। प्रहरीले घटनामा प्रयोग भएको कोदालो नजिकैको बारीमा फेला पारेको जनाएको छ।

घटनापछि बले थापा फरार भएका छन्। उनको खोजी भइरहेको र घटनाबारे थप अनुसन्धान जारी रहेको प्रहरी नायब उपरीक्षक पुरीले बताए।