महोत्तरी, १२ सेप्टेम्बर २०२६ — महोत्तरीको बलवा नगरपालिका–७ बनौटास्थित एक घरको सेफ्टी ट्याङ्कीभित्र २२ वर्षीय युवकको टुक्रा–टुक्रा पारिएको अवस्थामा शव फेला परेको छ। घटनाको अनुसन्धानका क्रममा प्रहरीले चार जनालाई नियन्त्रणमा लिएको छ।
मृतकको पहिचान भंगाहा नगरपालिका–६ बस्ने अशोक कुमार वातरका २२ वर्षीय छोरा विवेक कुमार सरदारका रूपमा भएको छ।
प्रहरीका अनुसार भदौ १४ गते साँझ विवेक जलेश्वर नगरपालिका–९ पिगौनस्थित दिदीको घरबाट मोटरसाइकलमा घरतर्फ फर्कने क्रममा बेपत्ता भएका थिए। छोरा हराएपछि उनका बुबाले भदौ १६ गते जिल्ला प्रहरी कार्यालय महोत्तरीमा हुलियासहित खोजतलासका लागि निवेदन दिएका थिए।
खोजतलासका क्रममा प्रहरीले बनौटास्थित अशोक कुमार ठाकुरको घरपछाडि रहेको सेफ्टी ट्याङ्कीबाट विवेकको शव बरामद गरेको हो। शव टुक्रा–टुक्रा पारिएको अवस्थामा फेला परेको प्रहरीले जनाएको छ।
घटनाको थप अनुसन्धानका लागि प्रहरीले घरधनी ५८ वर्षीय अशोक कुमार ठाकुर, उनकी ५५ वर्षीया श्रीमती रामकली देवी र २२ वर्षीया बुहारी सोनु कुमारी ठाकुरलाई नियन्त्रणमा लिएको छ।
