जेनजी आन्दोलनका क्रममा केन्द्रीय कारागारबाट भागेका कैदी सिरहाबाट पक्राउ

सिरहा, नोभेम्बर १, २०२६ — जेनजी आन्दोलनका क्रममा काठमाडौंस्थित केन्द्रीय कारागारबाट भागेर फरार भएका लागुऔषध मुद्दाका एक कैदीलाई प्रहरीले सिरहास्थित उनकै घरबाट पक्राउ गरेको छ।

पक्राउ पर्नेमा धनगढीमाई नगरपालिका–१४ का ३८ वर्षीय झरेन्द्र ज्यू ठकुरी रहेका छन्। जिल्ला प्रहरी कार्यालय सिरहाका अनुसार विशेष सूचनाका आधारमा लागुऔषध नियन्त्रण ब्युरोको गोलबजार शाखा र जिल्ला प्रहरी कार्यालयबाट खटिएको संयुक्त टोलीले शुक्रबार उनलाई पक्राउ गरेको हो।

प्रहरी प्रवक्ता एवं प्रहरी नायब उपरीक्षक रमेशबहादुर पालका अनुसार ठकुरीलाई १ सय ५८ ग्राम ८ सय मिलिग्राम खैरो हेरोइनसम्बन्धी मुद्दामा काठमाडौं जिल्ला अदालतले १५ वर्ष कैद र १ लाख रुपैयाँ जरिवानाको फैसला सुनाएको थियो।

अदालतको फैसलापछि उनी काठमाडौंको सुन्धारास्थित केन्द्रीय कारागारमा कैद भुक्तान गरिरहेका थिए। तर, २०८२ भदौ २४ गते भएको जेनजी आन्दोलनका क्रममा उनी कारागारबाट भागेर फरार भएको प्रहरीले जनाएको छ।

पक्राउ परेका ठकुरीलाई आवश्यक प्रक्रिया पूरा गरी कारागार कार्यालय सिरहामा बुझाइएको प्रहरीले जनाएको छ।