पूर्वसशस्त्र प्रहरी जवानसहित तीन जना १३२ ग्राम खैरो हेरोइनसहित पक्राउ

काठमाडौँ, नोभेम्बर ७, २०२६ — डाँका चोरी मुद्दामा सात वर्ष कैद भुक्तान गरेर छुटेका पूर्वसशस्त्र प्रहरी जवानसहित तीन जनालाई प्रहरीले खैरो हेरोइनसहित पक्राउ गरेको छ।

लागुऔषध नियन्त्रण ब्यूरोबाट खटिएको टोलीले बिहीबार काठमाडौँबाट उनीहरूलाई पक्राउ गरेको हो। पक्राउ पर्नेमा गुल्मीको इस्मा गाउँपालिका–५ का ३७ वर्षीय युवराज भण्डारी, सप्तरीको राजविराज नगरपालिका–३ का ३३ वर्षीय कौशल कुमार राय र धनुषाको नगराइन नगरपालिका–५ का गोपाल साह छन्।

ब्यूरोका अनुसार उनीहरूको साथबाट १३२ ग्राम ११० मिलिग्राम खैरो हेरोइन, दुई लाख ५० हजार रुपैयाँ नगद र डिजिटल तराजु बरामद भएको छ।

ब्यूरोका प्रहरी उपरीक्षक दुर्गा रेग्मीले रातोपाटीलाई बताएअनुसार सुरुमा भण्डारीलाई काठमाडौँको तारकेश्वर नगरपालिका–८ स्थित शिव मन्दिर नजिकबाट पक्राउ गरिएको थियो। उनको डेरा कोठामा खानतलासी गर्दा ३५ ग्राम ४६० मिलिग्राम खैरो हेरोइन र दुई लाख ५० हजार रुपैयाँ नगद फेला परेको थियो।

भण्डारी सशस्त्र प्रहरीका पूर्व जवान हुन्। उनीसँगको बयानका आधारमा प्रहरीले भक्तपुरबाट गोपाल साह र कौशल कुमार रायलाई पक्राउ गरेको हो। उनीहरूको साथबाट थप ९६ ग्राम ६५० मिलिग्राम खैरो हेरोइन बरामद भएको प्रहरी उपरीक्षक रेग्मीले जानकारी दिए।

भण्डारी यसअघि २०७६ भदौ १९ गते डाँका चोरी मुद्दामा पक्राउ परेका थिए। उक्त मुद्दामा उनले सात वर्ष कैद र ८० हजार रुपैयाँ जरिवाना भुक्तान गरेका थिए। उनी २०८३ भदौ २४ गते कारागारबाट छुटेका थिए।