मोरङ, अक्टोबर ३०, २०२६ — मोरङको रतुवामाई नगरपालिकामा लागुऔषध कारोबारीलाई नियन्त्रणमा लिने क्रममा प्रहरीले आठ राउन्ड गोली चलाउँदा दुई भारतीय नागरिक घाइते भएका छन् भने तीन जना पक्राउ परेका छन्। उनीहरूको साथबाट पेस्तोल र करिब ५०० ग्राम खैरो हेरोइन बरामद भएको छ।
मोरङ जिल्ला प्रहरी कार्यालयका प्रवक्ता डीएसपी मकेन्द्रकुमार मिश्रका अनुसार घाइते हुनेमा भारतको अररिया जिल्लास्थित कुशाहाका २२ वर्षीय दीपककुमार बोसाक र कुटुमगन्जका ४० वर्षीय पुरन बोसाक छन्। दुवैको विराटनगरस्थित कोशी अस्पतालमा उपचार भइरहेको छ।
