झापामा जग्गा प्राप्तिका लागि ६० हजारभन्दा बढी परिवारको निवेदन दर्ता

झापा, नोभेम्बर ५, २०२६ — झापामा जग्गा प्राप्तिका लागि भूमिहीन दलित, भूमिहीन सुकुमवासी र अव्यवस्थित बसोबासी गरी ६० हजार ५७० परिवारले निवेदन दर्ता गराएको भूमि समस्या समाधान समितिले जनाएको छ।

समितिका अध्यक्ष तथा प्रमुख जिल्ला अधिकारी श्रवणकुमार पोखरेलका अनुसार भूमिहीन दलिततर्फ दुई हजार ८९६, भूमिहीन सुकुमवासीका तर्फबाट १५ हजार ७८३ र अव्यवस्थित बसोबासीका तर्फबाट ४१ हजार ८५१ परिवारको आवेदन परेको छ। आवेदन दिने समूहमा अव्यवस्थित बसोबासीको सङ्ख्या सबैभन्दा बढी छ।

यसैगरी, अघिल्ला आयोगबाट काम अधुरो तथा अपुरो रहेका पाँच हजार २९६ परिवारका निवेदनसमेत रहेको समितिले जनाएको छ।

पोखरेलका अनुसार जग्गा व्यवस्थापनका लागि राजस्व दर परिमार्जन गरिएको छ। नयाँ व्यवस्थाअनुसार आवास प्रयोजनका लागि न्यूनतम मूल्याङ्कनको १२ प्रतिशत र कृषि प्रयोजनका लागि सात प्रतिशत राजस्व निर्धारण गरिएको छ।

सर्वसाधारणका जग्गासम्बन्धी समस्या छिटो समाधान गर्ने उद्देश्यले समितिका कर्मचारी तथा पदाधिकारी निरन्तर काममा खटिएको उनले बताए।

यसैबीच, भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले सोमबार र मङ्गलबार जिल्लाका विभिन्न पालिकामा रहेका सुकुमवासी परिवारसँग भेट गरेकी छन्।