सांसद इन्दिरा राना मगरद्वारा झापामा हात्ती आतङ्क र जग्गा समस्याबारे सरकारको ध्यानाकर्षण

काठमाडौं, अक्टोबर २, २०२६ — राष्ट्रिय स्वतन्त्र पार्टीकी सांसद इन्दिरा राना मगरले जंगली हात्तीको आक्रमण र जग्गा स्वामित्वसम्बन्धी समस्याबाट झापाका जनता पीडित रहेको भन्दै सरकारको ध्यानाकर्षण गराएकी छन्।

शुक्रबार प्रतिनिधिसभाको बैठकमा बोल्दै राना मगरले बाली भित्र्याउने समयमा हात्तीबाट हुने क्षति कम गर्न तथा जग्गाको निस्सा पाइसकेका नागरिकलाई तत्काल लालपुर्जा उपलब्ध गराउन सरकारसँग माग गरिन्।

दसैँ नजिकिँदै गर्दा झापाका किसानहरू बाली जोगाउन रातभर जाग्राम बस्न बाध्य भएको उनले संसद्मा बताइन्।

हात्तीको समस्या मात्र नभई जग्गासम्बन्धी समस्या पनि गम्भीर रहेको उल्लेख गर्दै उनले जग्गाको निस्सा पाइसकेका सुकुम्बासीलाई पुनः नापीका नाममा थप दुःख दिने काम भइरहेको बताइन्।

केही स्थानीय तहबाट ‘माथिबाट आदेश आएको’ भन्दै भ्रम फैलाउने काम भइरहेको जनगुनासो सुनिएको उल्लेख गर्दै उनले यस विषयमा सम्बन्धित मन्त्रालयले आफ्नो धारणा स्पष्ट पार्नुपर्नेमा जोड दिइन्।

हात्ती नियन्त्रणका लागि सरकारले गरेका प्रयासहरू प्रभावहीन बनेको टिप्पणी गर्दै उनले त्यसलाई ‘हात्ती आयो हात्ती आयो फुस्स’ भन्ने उखानसँग तुलना गरिन्। उक्त उखान कुनै विषयमा ठूलो अपेक्षा वा चर्चा भए पनि अन्ततः त्यसबाट खासै परिणाम नआएको अवस्थालाई जनाउन प्रयोग गरिन्छ।

‘किसानहरू अहिले बाली जोगाउन रातभर निद्रा त्यागेर हात्ती रुङ्न बाध्य छन्, तर सरकारबाट ठोस राहतको प्रत्याभूति हुन सकेको छैन। निस्सा पाइसकेका सुकुम्बासीले अब छिटो लालपुर्जा पाउनुपर्छ, प्रक्रियामाथि प्रक्रिया थपेर उनीहरूलाई थप कष्ट दिनु हुँदैन,’ उनले भनिन्।

हात्तीबाट पीडित किसानलाई तत्काल उचित राहत तथा लालपुर्जाको पर्खाइमा रहेका सुकुम्बासी नागरिकलाई स्वामित्वको प्रमाणपत्र उपलब्ध गराउन सरकारले स्पष्ट कार्ययोजना सार्वजनिक गर्नुपर्ने माग राना मगरले गरिन्।