युवा पलायनले भोजपुरका किसानलाई धान भित्र्याउन जनशक्ति अभाव

भोजपुर, अक्टोबर २८, २०२६ — गाउँबाट युवा जनशक्ति वैदेशिक रोजगारी र सहरतर्फ पलायन हुन थालेपछि भोजपुरका किसानलाई धान काट्न र थन्क्याउन कामदार पाउन मुस्किल हुन थालेको छ।

खेतीपातीमा महिनौँ मेहनत गरेका किसानलाई धान पाकेपछि समयमै बाली भित्र्याउन समस्या भइरहेको छ। कृषि कामका लागि आवश्यक जनशक्ति नहुँदा किसानले धान काट्ने र घरसम्म पुर्‍याउने काममा कठिनाइ भोग्नुपरेको छ।

धान काट्ने, बिटा बाँध्ने, खेतबाट खलोमा बोकेर लैजाने, झाँट्ने, बत्ताउने र घरसम्म पुर्‍याउने काममा शारीरिक श्रम बढी लाग्छ। गाउँमा युवा जनशक्ति घट्दै गएपछि यी काम सम्पन्न गर्न कठिन भएको किसान बताउँछन्।

टेम्केमैयुङ गाउँपालिका–६ का किसान बलबहादुर राईले वैदेशिक रोजगारी र सहर केन्द्रित बसाइँसराइका कारण गाउँमा युवा जनशक्तिको अभाव बढेको बताए। पहिले गाउँमै पर्याप्त कामदार पाइने गरे पनि अहिले धान थन्क्याउने समयमा कामदार खोज्न कठिन हुने गरेको उनको भनाइ छ।

“गाउँमा खेती गर्ने युवा घट्दै गएका छन्। धान पाकेपछि काट्ने, बिटा बाँध्ने, बोकेर खलोमा पुर्‍याउने र झाँटेर घरसम्म भित्र्याउने काममा बलियो जनशक्ति चाहिन्छ। तर, अहिले गाउँमा युवा नहुँदा यी काम गर्न कठिन भएको छ,” उनले भने।

हतुवागढी गाउँपालिका–२ लुङ्गिनका किसान जयबहादुर थापाले युवा जनशक्ति गाउँमा नहुँदा खेतीपातीको काम महिला, ज्येष्ठ नागरिक र परिवारका सदस्यको भरमा गर्नुपर्ने अवस्था रहेको बताए।