भोजपुरको खावामा व्यावसायिक सुन्तला खेती विस्तार हुँदै

भोजपुर, सेप्टेम्बर १५, २०२६ — भोजपुरको टेम्केमैयुङ गाउँपालिका–५ खावाका किसान व्यावसायिक सुन्तला खेतीतर्फ आकर्षित हुँदै गएका छन्।

परम्परागत अन्नबालीबाट सीमित आम्दानी हुने भएपछि किसानले सुन्तला खेतीलाई वैकल्पिक तथा दिगो आम्दानीको स्रोतका रूपमा अपनाउन थालेका हुन्। केही वर्षअघिसम्म घरायसी प्रयोजनमा सीमित रहेको सुन्तला खेती अहिले क्रमशः व्यावसायिक रूपमा विस्तार हुँदै गएको छ।

गाउँका धेरै किसानले खाली तथा कम उपयोगमा रहेका जमिनलाई व्यवस्थित रूपमा उपयोग गर्दै सुन्तलाका बगैँचा विस्तार गरेका छन्। परम्परागत बालीको तुलनामा सुन्तला खेतीबाट राम्रो आम्दानी लिन सकिने भएपछि किसान यसतर्फ थप उत्साहित भएका छन्।

कृषक चण्डालकुमार राईले व्यावसायिक रूपमा सुन्तला खेती गर्दा अन्य बालीको तुलनामा राम्रो आम्दानी लिन सकिने बताए। उनका अनुसार सुन्तलासँगै बिरुवा उत्पादन गरेर बिक्री गर्दा थप आम्दानीसमेत हुने गरेको छ।

“सुन्तला खेतीसँगै बिरुवा उत्पादन गरेर बिक्री गर्दा थप आम्दानी लिन सकिएको छ,” उनले भने, “यसले घरखर्च चलाउनसँगै बचत गर्नसमेत सहयोग पुगेको छ।”

पछिल्लो समय खावा केराबारी क्षेत्रका किसान व्यावसायिक सुन्तला खेतीमा थप सक्रिय भएका छन्।

खावाको हावापानी, माटोको बनावट र उचाइ सुन्तला खेतीका लागि अनुकूल रहेको स्थानीय किसान देउराम राईले बताए। उनका अनुसार यहाँ उत्पादन हुने सुन्तलाको स्वाद, गुणस्तर र आकार राम्रो हुने भएकाले बजारमा मागसमेत राम्रो छ।

व्यवस्थित रूपमा खेती विस्तार गर्न सके खावा क्षेत्र भोजपुरकै प्रमुख सुन्तला उत्पादन केन्द्रका रूपमा विकास हुन सक्ने सम्भावना रहेको राईले बताए।

वडाध्यक्ष सुनिल राईले कृषि क्षेत्रको विकास गर्दै किसानको जीवनस्तर उकास्ने उद्देश्यले वडाले सुन्तला खेती प्रवर्द्धन कार्यक्रम सञ्चालन गरिरहेको बताए।

“हामीले किसानलाई प्राविधिक सहयोगसँगै गुणस्तरीय बिरुवा वितरण गर्दै आएका छौँ,” उनले भने, “यस कार्यक्रमले आगामी वर्षमा उत्पादन वृद्धि हुनुका साथै किसानको आम्दानीमा सुधार ल्याउने विश्वास गरेका छौँ।”