बोड्रममा, टर्की, २५ अगस्ट २०२६ — टर्कीमा रोजगारीका क्रममा आफूले शोषण र कठिन परिस्थितिको सामना गर्नुपरेको आरोप लगाउँदै भावुक भिडियो सार्वजनिक गरेकी नेपाली महिला सुसिला भुसाल छिट्टै नेपाल फर्किने भएकी छन्।
अर्घाखाँची स्थायी घर भएकी भुसालले हालै १३ मिनेट लामो टिकटक भिडियो सार्वजनिक गर्दै रोजगारीका लागि टर्की पुगे पनि आफूले गर्ने कामबारे गलत जानकारी दिइएको आरोप लगाएकी थिइन्।
उनका अनुसार नेपालबाट टर्की पठाउने म्यानपावर कम्पनीले आफूले सहयोग माग्दा आवश्यक सहयोग गरेन। उनले आफूलाई स्पामा काम गर्न र आफ्नो इच्छाविपरीत यौन गतिविधिमा संलग्न हुन दबाब दिइएको आरोप लगाएकी छन्।
भुसालले आफू बसेको स्थानको अवस्था पनि निकै दयनीय रहेको बताएकी छन्। उनले कन्टेनरभित्र सुत्नुपरेको समेत भिडियोमा उल्लेख गरेकी छन्। वैध रोजगारी पाउने अपेक्षासहित नेपालबाट टर्की पुगेपछि आफूले भोगेको कठिन अवस्थाबारे उनले भिडियोमार्फत जानकारी दिएकी हुन्।
अर्घाखाँचीबाट प्रतिनिधित्व गर्ने राष्ट्रिय स्वतन्त्र पार्टीका सांसद हरि प्रसाद भुसालले सुसिला छिट्टै नेपाल फर्किने तयारीमा रहेको बताएका छन्। उनका अनुसार उनको नेपाल फिर्ती सहज बनाउन परराष्ट्र मन्त्रालय र सम्बन्धित नेपाली दूतावासमार्फत समन्वय भइरहेको छ।
