दाङ, अक्टोबर २३, २०२६ — दाङको तुलसीपुर उपमहानगरपालिका–१८ स्थित रानी सामुदायिक वन क्षेत्रमा कृत्रिम ड्याम निर्माण भएपछि स्थानीय किसानलाई सिँचाइमा सहज भएको छ। यसले विगतमा सुक्खा रहने खेतबारीमा सिँचाइ पुर्याउन र जमिनलाई हराभरा बनाउन सहयोग गरेको छ।
बृहत् दाङ उपत्यका सिँचाइ आयोजनामार्फत निर्माण गरिएको ड्यामबाट अहिले हेमन्तपुर क्षेत्रमा सिँचाइ भइरहेको छ। धनखन्ने, सानोदमार र दौडारे क्षेत्रका करिब २०० बिघा जमिनमा पनि सिँचाइ सुविधा विस्तार गर्ने काम अघि बढेको स्थानीय ड्याम संरक्षण समितिका अध्यक्ष गोविन्द नेपालीले बताए।
विगतमा यी क्षेत्रका किसानले खेतीपातीका लागि मुख्यतः आकाशे पानीमा निर्भर रहनुपर्ने अवस्था थियो। ड्याम निर्माणपछि सिँचाइमा पहुँच सहज भएको र कृषि प्रयोजनका लागि पानीको उपलब्धता बढेको छ।
नेपालीका अनुसार ड्याम निर्माणपछि आसपासका कुवा तथा इनारमा पानीको सतहसमेत बढेको छ। यसले स्थानीय बासिन्दालाई पानीको उपलब्धतामा सहजता दिएको छ।
तुलसीपुर उपमहानगरपालिका–१८ का वडाध्यक्ष माधव वलीले विगतमा चैत महिनामै सुक्ने कुवा तथा इनार अहिले तालतलैयाबाट जमिनमुनि पानी पुनर्भरण हुँदा वर्षैभरि नसुक्ने गरेको बताए।
