विराटनगरका ६९ वर्षीय ब्याट्री व्यवसायीको हत्या आरोपमा हार्डवेयर व्यापारीसहित तीन पक्राउ

मोरङ, अक्टोबर २९, २०२६ — विराटनगरमा करिब चार दशकदेखि ब्याट्री व्यवसाय गर्दै आएका ६९ वर्षीय लालजीप्रसाद गुप्ताको हत्या आरोपमा प्रहरीले हार्डवेयर व्यापारीसहित तीन जनालाई पक्राउ गरेको छ।

पक्राउ पर्नेमा विराटनगर महानगरपालिका–६ स्वागत चोकका ३६ वर्षीय अफ्रोज आलम छन्। उनले महावीर चोकमा हार्डवेयरको गोदाम सञ्चालन गर्दै आएका थिए। शव व्यवस्थापनमा सहयोग गरेको आरोपमा प्रहरीले १३ वर्षीय भारतीय बालक र १६ वर्षीय नेपाली किशोरलाई पनि पक्राउ गरेको छ। उनीहरूलाई मंगलबार राति पक्राउ गरी बुधबार पत्रकार सम्मेलनमार्फत सार्वजनिक गरिएको प्रहरीले जनाएको छ।

विराटनगर–६ धरान रोडमा ‘लाल ब्याट्री एन्ड सन्स ट्रेडर्स’ सञ्चालन गर्दै आएका गुप्ता कात्तिक ६ गते शुक्रबार दिउँसो करिब ३ बजेदेखि बेपत्ता भएका थिए। त्यसको दुई दिनपछि सुनसरीको बर्जु गाउँपालिका–२ भीमपुरस्थित केशलिया खोलाको किनारमा उनको शव बेवारिसे अवस्थामा फेला परेको थियो।

जिल्ला प्रहरी कार्यालय सुनसरीबाट खटिएको टोलीले प्राविधिक तथा स्थलगत अनुसन्धानपछि उनीहरूलाई पक्राउ गरेको प्रहरीले जनाएको छ।

प्रहरीको प्रारम्भिक अनुसन्धानअनुसार विराटनगर–६ स्थित ‘माता इलेक्ट्रिक वर्क्स’बाट केही दिनअघि पानी तान्ने मोटरमा प्रयोग हुने तार हराएको थियो। त्यसपछि गुप्ताले आलमले तार चोरी गरेको हल्ला फैलाएको विषयलाई लिएर उनीहरूबीच विवाद बढेको थियो।

अनुसन्धानका क्रममा आलमले उक्त आरोपबारे छलफल गर्ने भन्दै कात्तिक ६ गते गुप्तालाई आफ्नै घरमा बोलाएको खुलेको प्रहरीले जनाएको छ। घरमा विवाद भएपछि आलमले फलामको जीआई पाइपले गुप्ताको टाउकोमा प्रहार गरेको र गम्भीर घाइते भएपछि फेरि आक्रमण गर्दा उनको घटनास्थलमै मृत्यु भएको प्रहरीको भनाइ छ।