सवारीमा सुरक्षा उपकरण जडान गर्ने कम्पनीको सूचीकरण प्रक्रिया सुरु

काठमाडौं, अक्टोबर २९, २०२६ — यातायात व्यवस्था विभागले सवारी साधनमा सुरक्षा तथा प्रविधिसम्बन्धी उपकरण जडान गर्ने सेवा प्रदायक कम्पनीलाई सूचीकरण गर्न आवेदन प्रक्रिया सुरु गरेको छ।

विभागले ‘सुरक्षित तथा प्रविधिमैत्री सवारी सञ्चालन सम्बन्धी मापदण्ड, २०८३’ कार्यान्वयनका लागि भेहिकल लोकेशन ट्र्याकिङ डिभाइस, आपत्कालीन सूचना बटन अर्थात् प्यानिक बटन र क्यामेरा प्रणाली उपलब्ध गराउन इच्छुक कम्पनीलाई ३५ दिनभित्र आवेदन दिन आह्वान गरेको हो।

मापदण्डअनुसार आवेदन दिने कम्पनीसँग जीपीएस तथा टेलिमेटिक्स उत्पादनमा कम्तीमा पाँच वर्षको अनुभव, नेपाल दूरसञ्चार प्राधिकरणको टीएपी–०४ स्वीकृति, अन्तर्राष्ट्रिय गुणस्तर प्रमाणीकरण र काठमाडौं बाहिर सेवा केन्द्र हुनुपर्नेछ।

आवश्यक कागजात पूरा भएका कम्पनीका उपकरण विभागको सर्भरमा परीक्षण गरिनेछ। परीक्षणमा सफल उपकरणलाई सुरुमा तीन महिनाका लागि अस्थायी सूचीकरण गरिने र त्यसपछि पूर्ण सूचीकरणको प्रक्रिया अघि बढाइने विभागले जनाएको छ।

मापदण्डविपरीतका उपकरण जडान गरिसकेका सवारी साधनले पनि छ महिनाभित्र नयाँ मापदण्डअनुसारका उपकरण जडान गरिसक्नुपर्नेछ।

इच्छुक कम्पनीले विभागको कार्यालयमा वा इमेलमार्फत आवेदन दिन सक्नेछन्।