दीपक भट्टको बन्दी प्रत्यक्षीकरण रिटमा सर्वोच्च अदालतमा सुनुवाइ सुरु

काठमाडौँ, नोभेम्बर ४, २०२६ — सम्पत्ति शुद्धीकरण मुद्दामा थुनामा रहेका दीपक भट्टको बन्दी प्रत्यक्षीकरण निवेदनमाथि सर्वोच्च अदालतमा सुनुवाइ सुरु भएको छ।

भट्टको रिटमाथि न्यायाधीशद्वय शारंगा सुवेदी र नित्यानन्द पाण्डेयको संयुक्त इजलासमा सुनुवाइ भइरहेको छ।

भट्टका बुबा चतुर्भुज भट्टले उक्त निवेदन दर्ता गराएका हुन्। यसअघि गत कात्तिक १३ गते न्यायाधीश सुवेदी र शान्तिसिंह थापाको संयुक्त इजलासमा सुनुवाइका लागि पेस भए पनि हेर्न नभ्याइनेमा राखिएको थियो।

सम्पत्ति शुद्धीकरण मुद्दामा विशेष अदालतले असार ३ गते दीपक भट्टलाई पुर्पक्षका लागि थुनामा पठाउने आदेश दिएको थियो। सोही मुद्दामा मुछिएका सुलभ अग्रवाललाई पनि अदालतले त्यही दिन थुनामा पठाउने निर्णय गरेको थियो।

विशेष अदालतका अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको इजलासले दुवैलाई थुनामा पठाउने आदेश दिएको थियो।

उक्त आदेशविरुद्ध गैरकानुनी रूपमा थुनामा राखिएको दाबी गर्दै असोज ७ गते सर्वोच्च अदालतमा बन्दी प्रत्यक्षीकरणको निवेदन दर्ता गरिएको थियो।