चितवनमा सवारी चालक अनुमतिपत्रको परीक्षा रोकिँदा हजारौँ सेवाग्राही प्रभावित

चितवन, अक्टोबर २९, २०२६ — सर्वोच्च अदालतको आदेशपछि चितवनमा सवारी चालक अनुमतिपत्रको लिखित तथा प्रयोगात्मक परीक्षा गत साउन १० गतेदेखि रोकिँदा चितवनसहित आसपासका जिल्लाबाट सेवा लिन आउने सेवाग्राही प्रभावित भएका छन्।

यातायात व्यवस्था कार्यालय भरतपुरका सूचना अधिकारी गोविन्द पौडेलका अनुसार स्थानीय एक निजी ट्रायल सेन्टरमार्फत हुँदै आएको सेवा रोक्न अदालतले आदेश दिएपछि परीक्षा सञ्चालन हुन सकेको छैन।

परीक्षा बन्द हुँदा पुनःसीप परीक्षा अर्थात् रि–ट्रायल दिन प्रतीक्षामा रहेका करिब ८०० जना प्रभावित भएका छन्। त्यस्तै, साप्ताहिक रूपमा रि–ट्रायल दिने र नियमित परीक्षा दिने गरी करिब दुई हजार सेवाग्राहीलाई समस्या परेको पौडेलले बताए।

उनका अनुसार अदालतले उक्त ट्रायल सेन्टरसँग गरिएको ठेक्का रद्द गरी पुनःठेक्का प्रक्रिया अघि बढाउन आदेश दिएको थियो। तर, सम्बन्धित मन्त्रालयबाट निर्देशन नआएका कारण कार्यालयले नयाँ बोलपत्र आह्वान गर्न नसकेको उनले बताए।

“मन्त्रालयबाट कुनै परिपत्र नआएका कारण सवारी चालक अनुमतिपत्रको काम गर्न सकिएको छैन,” पौडेलले भने।

हाल कार्यालयले सवारी चालक अनुमतिपत्र, सवारी धनी प्रमाणपत्र र रुट परमिटसम्बन्धी सेवा दिइरहेको भए पनि लिखित तथा प्रयोगात्मक परीक्षा सञ्चालन गर्न सकेको छैन।