दार्चुलाका शिक्षक बलदेव धामी मृत्यु प्रकरणमा आठ जनालाई धरौटीमा छाड्न उच्च अदालतको आदेश

दार्चुला, सेप्टेम्बर १४, २०२६ — दार्चुलाको व्यास गाउँपालिका–४ स्थित सम्पाल माध्यमिक विद्यालयका प्रधानाध्यापक बलदेवसिंह धामीको मृत्यु प्रकरणमा पक्राउ परेका आठ जनालाई धरौटीमा रिहा गर्न उच्च अदालत दिपायल, महेन्द्रनगर इजलासले आदेश दिएको छ।

यसअघि दार्चुला जिल्ला अदालतले मुद्दाको थप कारबाहीका लागि आठै जनालाई थुनामा पठाएको थियो। उच्च अदालतले जिल्ला अदालतको थुनामा राख्ने आदेश उल्टाउँदै सबैलाई धरौटीमा रिहा गर्न आदेश दिएको हो।

उच्च अदालतका न्यायाधीश मातृकाप्रसाद भण्डारी र गिरिराज गौतमको संयुक्त इजलासले उक्त आदेश दिएको हो।

आत्महत्या दुरुत्साहनसम्बन्धी आरोप लागेका परमानन्द भट्ट र दलिदत्त भट्टलाई जनही २ लाख रुपैयाँ धरौटी माग गरिएको छ।

त्यस्तै, खिमानन्द भट्ट, हरिदत्त भट्ट, पुष्करराज भट्ट र पदमराज भट्टलाई जनही १ लाख ५० हजार रुपैयाँ धरौटीमा रिहा गर्न आदेश दिइएको छ। नरेन्द्रदत्त भट्ट र विक्रमसिंह कुँवरलाई जनही १ लाख रुपैयाँ धरौटी तोकिएको छ।

शुक्रबारसम्म उच्च अदालतको लिखित आदेश दार्चुला जिल्ला कारागारमा पुगिसकेको थिएन। अदालतले शुक्रबार नै आदेश जारी गरेकाले औपचारिक पत्र कारागारमा आइपुग्न केही समय लाग्न सक्ने जेल प्रशासनले जनाएको छ।

दार्चुला जिल्ला कारागारका जेलर उमेशसिंह बिष्टले अदालतको आधिकारिक पत्र प्राप्त भएपछि रिहाइको प्रक्रिया अघि बढाइने बताए।

प्रधानाध्यापक धामी वैशाखमा विद्यालयभित्र झुन्डिएको अवस्थामा भेटिएका थिए। त्यसपछि उनलाई मृत घोषणा गरिएको थियो।

मृत्यु हुनुअघि धामीले फेसबुकमा अहिले मुद्दा खेपिरहेका आठै जनाको नाम उल्लेख गर्दै एउटा पोस्ट गरेका थिए। उक्त पोस्टमा उनले आफूलाई आत्महत्या गर्न बाध्य हुने अवस्थासम्म दबाब दिइएको आरोप लगाएका थिए।

त्यसपछि प्रहरीले आठै जनालाई पक्राउ गरी धामीलाई आत्महत्या गर्न दुरुत्साहन गरेको आरोपमा अनुसन्धान अघि बढाएको थियो।