चितवनमा बाघको आक्रमणबाट ४६ वर्षीय भीम महतोको मृत्यु

चितवन, नोभेम्बर ४, २०२६ — भरतपुर महानगरपालिका–२७ स्थित राधाकृष्ण सामुदायिक वनको बेथरी खोलानजिक बाघको आक्रमणबाट ४६ वर्षीय भीम महतोको मृत्यु भएको छ।

भरतपुर–२७ निवासी महतो मंगलबार दिउँसो तीन जना साथीसँगै निउरो टिप्न गएका थिए। दिउँसो करिब २ बजे बाघले आक्रमण गरी उनलाई लगेको थियो।

घटनाबारे उनीसँगै गएका साथीहरूले सोही दिन साँझ ५:४५ बजे इलाका प्रहरी कार्यालय दिव्यनगर, चितवनमा जानकारी गराएका थिए।

सूचना प्राप्त भएपछि नेपाल प्रहरी, चितवन राष्ट्रिय निकुञ्ज, नेपाली सेना, स्थानीय बासिन्दा र वनका कर्मचारीको समन्वयमा खोजी सुरु गरिएको थियो।

खोजतलासका क्रममा बुधबार बिहान १०:५५ बजे चितवन राष्ट्रिय निकुञ्जभित्र महतोको शव फेला परेको हो।

शव भेटिएको स्थाननजिकै रहेको बाघलाई डार्ट हानेर नियन्त्रणमा लिइएको छ। घटनाबारे थप अनुसन्धान भइरहेको छ।