बाँकेको अम्बे स्टिल उद्योगमा आगलागी हुँदा आठ जना घाइते

बाँके, नोभेम्बर १, २०२६ — बाँकेको जानकी गाउँपालिका–५ बकसपुरस्थित अम्बे स्टिल सरिया कम्पनीमा आइतबार बिहान आगलागी हुँदा आठ जना घाइते भएका छन्।

कम्पनीभित्र फलाम पगाल्ने तीनवटा भट्टीमा विद्युत् सर्ट सर्किट भएपछि बिहान करिब ५:४० बजे अचानक आगलागी भएको हो। प्रत्येक भट्टीको क्षमता २५ टन रहेको छ।

घाइतेमध्ये बाँकेका पाँच जना र भारतको बहराइच जिल्लाका तीन जना छन्। उनीहरूलाई उपचारका लागि सुरुमा नेपालगञ्जस्थित भेरी अस्पताल पठाइएको थियो।

बाँकेका घाइतेमा जानकी गाउँपालिका–५ का २८ वर्षीय शिवप्रसाद चमार, २२ वर्षीय रामदिन हरिजन, २४ वर्षीय प्रेम धोबी, २९ वर्षीय दिलीपकुमार यादव र ३५ वर्षीय लक्ष्मीराम यादव रहेका छन्। चमार र हरिजनको अवस्था मध्यम तथा अन्य तीन जनाको अवस्था सामान्य रहेको छ।

त्यस्तै, भारतको बहराइच जिल्लाको कठौतियाका २९ वर्षीय राजकुमार निषाद, २४ वर्षीय नशिव कुमार निषाद र २५ वर्षीय विनोद कुमार निषाद घाइते भएका छन्। उनीहरू तीनै जनाको अवस्था सामान्य रहेको छ।

बिहान ८:४५ बजे शिवप्रसाद चमार र रामदिन हरिजनलाई थप उपचारका लागि भारतको लखनउ रिफर गरिएको छ।