२ अर्ब १६ करोडभन्दा बढीको क्रिप्टो कारोबार गरेको आरोपमा २८ वर्षीय युवक पक्राउ

काठमाडौं, अक्टोबर ३०, २०२६ — २ अर्ब १६ करोड रुपैयाँभन्दा बढीको क्रिप्टो कारोबार गरेको आरोपमा प्रहरीले एक २८ वर्षीय युवकलाई पक्राउ गरेको छ।

पक्राउ पर्नेमा धनुषाको सबैला नगरपालिका–१२ का २८ वर्षीय सुनिलकुमार यादव रहेका छन्।

विभिन्न विद्युतीय माध्यम तथा अनलाइन बेटिङ एप्लिकेसनमार्फत सट्टेबाजी खेल्ने र खेलाउने तथा अवैध रूपमा ठूलो परिमाणमा क्रिप्टो कारोबार भइरहेको सूचनाका आधारमा उनलाई पक्राउ गरिएको प्रहरीले जनाएको छ।

काठमाडौं उपत्यका अपराध अनुसन्धान कार्यालय टेकुबाट खटिएको टोलीले जिल्ला प्रहरी कार्यालय धनुषासँगको समन्वयमा यादवलाई पक्राउ गरेको हो।

प्रारम्भिक अनुसन्धानअनुसार यादवले हालसम्म २ अर्ब १६ करोड १ लाख २० हजार ८ सय २१ रुपैयाँ बराबरको क्रिप्टो कारोबार गरेको खुलेको छ।

अभौतिक मुद्राको प्रयोग गर्न नहुने कसुरमा जिल्ला अदालत काठमाडौंको अनुमति लिएर उनलाई हिरासतमा राखिएको प्रहरीले जनाएको छ। घटनाबारे थप अनुसन्धान भइरहेको छ।