केमार्ट बाट चोरी गरेको आरोप लगाउँदै अस्ट्रेलियाली व्यक्तिले नेपाली वृद्ध दम्पतीलाई सार्वजनिक रूपमा सोधपुछ गरे

ब्रिस्बेन, अस्ट्रेलिया, अक्टोबर २, २०२६ — अस्ट्रेलियामा एक व्यक्तिले केमार्ट डिपार्टमेन्ट स्टोरबाहिर रहेका नेपाली वृद्ध दम्पतीलाई सामानमा चोरीविरोधी सुरक्षा ट्याग लागेको देखेपछि चोरी गरेको आरोप लगाउँदै सार्वजनिक रूपमा सोधपुछ गरेपछि उनी आलोचनामा परेका छन्।

ट्रेन्ट कार्टर नामका ती व्यक्तिले घटनाको भिडियो बनाएर इन्स्टाग्राममा सार्वजनिक गरेका थिए। मूल रूपमा नेपालका सुर्खेतका रहेका वृद्ध दम्पती केमार्ट बाहिर प्याकेज गरिएको सामान लिएर बसिरहेका बेला कार्टर उनीहरू नजिक पुगेर उक्त सामान चोरी गरेको हो कि भनेर प्रश्न गरेको भिडियोमा देखिन्छ।

ती दम्पती आफ्ना छोरा र बुहारीलाई भेट्न करिब १५ दिनअघि अस्ट्रेलियाको ब्रिस्बेन पुगेका थिए। परिवारका अनुसार घटनाका बेला उनीहरू बुहारी र नातिसँगै केमार्टमा किनमेल गर्न गएका थिए।

कार्टरले सामानमा लागेको सुरक्षा ट्यागतर्फ देखाउँदै भिडियोमा, “ए, तिमीहरूले त्यो चोरेका हौ? चोरेका हौ? तिमी चोर हौ? तिमीहरूले चोरेका हौ?” भन्दै प्रश्न गरेका थिए।

कार्टरको प्रश्नपछि वृद्ध दम्पती अन्योलमा परेको र उनको प्रश्नको जवाफ दिन कठिनाइ भएको भिडियोमा देखिन्छ।

भिडियोको क्याप्सनमा कार्टरले आफूले दम्पतीलाई देख्दा केही असामान्य लागेको र उनीहरू भर्खरै केमार्टबाट सामान लिएर निस्किएको आफूलाई लागेको बताएका थिए।

पछि भिडियो सामाजिक सञ्जालमा व्यापक रूपमा फैलियो। सामान चोरी भएको पुष्टि नगरी वृद्ध दम्पतीलाई चोरीको आरोप लगाउँदै सार्वजनिक रूपमा सोधपुछ गरिएको भन्दै कार्टरको आलोचना भयो।

प्रत्यक्षदर्शीले दम्पतीले सामानको पैसा तिरेको दाबी

कार्टरको आरोपलाई सारा गढवाल नामकी महिलाले चुनौती दिएकी छन्। उनले आफू ग्राहकका रूपमा केमार्टमा उपस्थित रहेको र दम्पतीले काउन्टरमा सामानको पैसा तिरेको देखेको दाबी गरेकी छन्।

गढवालका अनुसार दम्पतीले सामान वैध रूपमा खरिद गरेका थिए तर स्टोरबाट बाहिरिँदा सामानमा लागेको सुरक्षा ट्याग वा स्टिकर हटाइएको थिएन भन्ने उनीहरूलाई थाहा नभएको हुन सक्छ।

उनले सामाजिक सञ्जालमा लेखेकी छन्, “उनीहरूले केही पनि चोरेका थिएनन्। म त्यहाँ ग्राहकका रूपमा उपस्थित थिएँ र उनीहरूले काउन्टरमा सामानको पैसा तिरेको देखेँ।”