भिक्टोरिया, अस्ट्रेलिया, अक्टोबर २३, २०२६ — परिवार भेट्न नेपालबाट अस्ट्रेलिया पुगेकी ६३ वर्षीया नेपाली महिलाको मेलबर्नको पश्चिमी क्षेत्रमा पर्ने टार्नेटमा सडक दुर्घटनामा मृत्यु भएको छ। घटनाबारे अनुसन्धान गरिरहेको प्रहरीले प्रत्यक्षदर्शी र ड्यासक्यामको दृश्य उपलब्ध गराउन आग्रह गरेको छ।
भिक्टोरिया प्रहरीले मंगलबार, अक्टोबर २० मा बिहान ५:३० बजेपछि एक पैदलयात्रीले लिक्स रोड र डेरिमट रोडको चोकनजिक महिलाको शव फेला पारेको जनाएको छ।
प्रहरीका अनुसार बिहानको पैदल यात्राका क्रममा डेरिमट रोडमा रहेको पैदलयात्री क्रसिङबाट बाटो काट्दै गर्दा उनलाई गाडीले ठक्कर दिएको हुन सक्ने आशंका छ। दुर्घटनाअघि उनी सडकमा दक्षिणतर्फ हिँडिरहेको हुन सक्ने अनुसन्धानकर्ताहरूको भनाइ छ।
प्रमुख सवारी दुर्घटना अनुसन्धान इकाइका प्रहरीले घटनामा संलग्न भएको आशंका गरिएको चालक र सवारीसाधन पहिचान गरेका छन्। ट्रुगानिनाका ३२ वर्षीय एक पुरुषले प्रहरीलाई बयान दिएका छन् भने उक्त सवारीसाधनलाई फरेन्सिक परीक्षणका लागि नियन्त्रणमा लिइएको छ।
यद्यपि, महिलाको मृत्युको कारण बनेको घटनाको वास्तविक परिस्थिति अझै अनुसन्धानकै क्रममा छ। घटनामा अन्य सवारीसाधन पनि संलग्न थिए वा थिएनन् भन्ने स्पष्ट भइसकेको छैन।
