इलाममा ६६ वर्षीया महिलाको मृत्यु प्रकरणमा भारतबाट फर्किएका युवक पक्राउ

इलाम, नोभेम्बर १४, २०२६ — इलाम नगरपालिका–१२ बान्द्रेस्थित खोल्सीमा मृत फेला परेकी ६६ वर्षीया जितमती लिम्बुको मृत्यु घटनामा संलग्न रहेको आरोपमा प्रहरीले एक युवकलाई पक्राउ गरेको छ।

पक्राउ पर्नेमा इलाम नगरपालिका–११ निवासी ३२ वर्षीय त्रिभुवन भुजेल रहेका छन्। जितमती गत असोज २१ गते साँझ खोल्सीमा मृत अवस्थामा फेला परेकी थिइन्।

प्रारम्भिक अनुसन्धानका क्रममा प्रहरीले मृतकको कानमा चोट देखेको थियो। उनले लगाएको सुनको माडवारी र प्रयोग गर्दै आएको मोबाइल फोनसमेत हराएको पाइएको थियो। यसले घटनालाई थप शङ्कास्पद बनाएको थियो।

प्रहरीले घटनास्थल आसपास खोजी गर्ने क्रममा शव भेटिएको ठाउँबाट करिब एक सय मिटर टाढा मोबाइलको खोल फेला पारेको थियो। त्यसपछि घटनाको अनुसन्धानलाई तीव्र बनाइएको थियो।

अनुसन्धानका क्रममा भुजेलको संलग्नता रहेको तथ्य खुलेको प्रहरीले जनाएको छ। घटनापछि फरार भएका उनी भारतको मिरिकमा लुकिछिपी बस्दै आएका थिए।

तिहार मनाउन नेपाल फर्कने क्रममा भुजेललाई प्रहरीले पक्राउ गरेको हो। उनलाई गत कात्तिक २० गते राति सूर्योदय नगरपालिका–२ स्थित फाटकको भित्री जङ्गलको बाटोबाट नियन्त्रणमा लिइएको प्रहरीले जनाएको छ।