सहुलियतपूर्ण स्रोत घट्दै गएपछि एआईआईबीबाट कम लागतको वित्तीय स्रोत खोज्दै नेपाल

काठमाडौं, सेप्टेम्बर २८, २०२६ — एसियाली पूर्वाधार लगानी बैंक (एआईआईबी) को ऋण तुलनात्मक रूपमा महँगो भएको भन्दै लामो समयदेखि ठूलो परिमाणमा स्रोत परिचालन गर्न हिच्किचाउँदै आएको नेपालले अब त्यहाँ उपलब्ध कम लागतका वित्तीय सुविधाको उपयोग गर्ने विकल्प खोज्न थालेको छ।

विश्व बैंक, एसियाली विकास बैंक र जापानलगायतका विकास साझेदारबाट विगतमा उपलब्ध हुँदै आएको सहुलियत क्रमशः घट्दै गएपछि सरकारले योग्य आयोजनामा एआईआईबीबाट उपलब्ध तुलनात्मक रूपमा सस्तो सुविधा उपयोग गर्नेबारे छलफल अघि बढाएको हो।

एआईआईबीले परियोजना तयारीका लागि अनुदान उपलब्ध गराउनुका साथै योग्य आयोजनामा ऋणको ब्याजदरमा थप सहुलियत दिन सकिने जनाएको छ।

कतारको दोहामा अर्थमन्त्री डा. स्वर्णिम वाग्लेसँग भएको भेटमा एआईआईबी अध्यक्ष जोउ जियायीले परियोजना तयारीका लागि अनुदान तथा ऋणको ब्याजदरमा थप सहुलियत उपलब्ध गराउन सकिने बताएकी हुन्।

भेटमा मन्त्री वाग्लेले एआईआईबीको लगानीमा सञ्चालित विद्युत् वितरण प्रणाली सुधार तथा विस्तार आयोजना र बुटवल–पोखरा सडकको अध्ययन शीघ्र सम्पन्न गर्न आग्रह गरेका थिए।

वाग्लेले हरित ऊर्जा, सीमापार विद्युत् प्रसारण लाइन, सडक तथा डिजिटल पूर्वाधारमा मध्यमकालीन र दीर्घकालीन स्रोत परिचालनका लागि एआईआईबी तथा अन्य विकास साझेदारसँग सहकार्य बढाउन पनि आग्रह गरेका थिए।

नेपालले विगतमा एआईआईबीको ऋण तुलनात्मक रूपमा महँगो भएको भन्दै त्यहाँबाट ठूलो परिमाणमा स्रोत परिचालन गरेको थिएन। विश्व बैंक, एसियाली विकास बैंक र जापानलगायतका विकास साझेदारबाट पाइने सहुलियत क्रमशः घट्दै गएपछि सरकारले थप ऋण स्रोत र विकल्प खोज्न थालेको हो।

एसियाली क्षेत्रमा पूर्वाधारमा लगानी बढाउने उद्देश्यले स्थापना भएको एआईआईबीको नेपाल सदस्य भए पनि अहिलेसम्म त्यहाँबाट ठूलो ऋण परिचालन भएको छैन। नेपालले विश्व बैंक र एसियाली विकास बैंकबाट तुलनात्मक रूपमा सस्तो ऋण पाइरहेको भन्दै एआईआईबीको उच्च ब्याजदरलाई कारण देखाउँदै आएको थियो।

अर्थ मन्त्रालयका अधिकारीहरूका अनुसार अब परिस्थितिमा केही परिवर्तन आएको छ। उनीहरूका अनुसार विगतमा सहुलियतपूर्ण ऋण दिँदै आएका विकास साझेदारले ब्याजदर बढाउनुका साथै कतिपय अवस्थामा ऋणको परिपक्वता अवधि पनि घटाएका छन्। त्यसैले एउटै स्रोतमा निर्भर रहनुभन्दा ऋणका विभिन्न स्रोत र विकल्प खुला राख्नुपर्ने आवश्यकता देखिएको हो।