दोहा, कतार, सेप्टेम्बर २८, २०२६ — अर्थमन्त्री डा. स्वर्णिम वाग्लेले नेपालमा लगानी विस्तार गर्न, विपद्पछिको पुनर्निर्माणमा सहयोग गर्न तथा सहुलियतपूर्ण वित्तीय स्रोतमा नेपालको पहुँच बढाउन एसियाली पूर्वाधार लगानी बैंक (एआईआईबी) लाई आग्रह गरेका छन्।
एआईआईबीको बोर्ड अफ गभर्नर्सको ११औँ वार्षिक बैठकमा सहभागी हुन दोहा पुगेका वाग्लेले आइतबार एआईआईबी अध्यक्ष जोउ जियायीसँग भएको भेटमा यस्तो आग्रह गरेका हुन्।
एआईआईबी अध्यक्ष जियायीले भोटेकोशी–त्रिशूली नदी प्रणालीमा आएको पछिल्लो विनाशकारी बाढीबाट भएको जनधनको क्षतिप्रति दुःख व्यक्त गर्दै नेपालमा बाढीपछिको पुनर्निर्माणका लागि बैंकबाट सम्भव सबै सहयोग गर्ने प्रतिबद्धता जनाइन्।
जियायीले परियोजना तयारीमा सहयोग गर्न एआईआईबीको प्रोजेक्ट प्रिपरेसन स्पेसल फन्डअन्तर्गत नेपाललाई अनुदान सहायता उपलब्ध गराइने बताइन्। उनले लेस डेभलप्ड मेम्बर्सका लागि रहेको स्पेसल फन्ड विन्डोबाट अनुदान उपयोग गरी नेपाललाई अत्यन्त सहुलियतपूर्ण ब्याजदरमा ऋण उपलब्ध गराउने विषयमा पनि बैंकले विचार गर्ने बताइन्।
अर्थमन्त्रीको सचिवालयका अनुसार जियायीले एआईआईबीको संस्थापक सदस्य नेपालसँग आर्थिक विकासका लागि थप सहकार्य गर्ने बैंकको प्रतिबद्धता पनि दोहोर्याइन्।
वाग्लेले जियायीलाई एआईआईबी अध्यक्षमा निर्वाचित भएकोमा बधाई दिँदै नेपाललाई बैंकले गर्दै आएको सहयोगप्रति धन्यवाद व्यक्त गरे।
अर्थमन्त्री वाग्लेले नेपालमा एआईआईबीको लगानीमा सञ्चालित आयोजनाहरू, विशेषगरी विद्युत् वितरण प्रणाली सुधार तथा विस्तार आयोजना र एक्सप्रेसवे अध्ययन, शीघ्र सम्पन्न गर्न पनि आग्रह गरे।
उनले एआईआईबीले लगानी गरेको अपर त्रिशूली–१ जलविद्युत् आयोजनामा भोटेकोशी–त्रिशूली बाढीले पुर्याएको क्षतिप्रति पनि चासो व्यक्त गरे।
वाग्लेले नेपालको मध्यमकालीन तथा दीर्घकालीन विकास प्रयासअन्तर्गत हरित ऊर्जा, सीमापार विद्युत् प्रसारण लाइन, सडक पूर्वाधार र डिजिटल पूर्वाधार विकासका लागि एआईआईबीको आफ्नै स्रोत तथा अन्य विकास साझेदारको वित्तीय स्रोत परिचालन गर्न पनि आग्रह गरे।
भेटका क्रममा वाग्लेले एआईआईबी अध्यक्ष जियायीलाई सन् २०२६ भित्र नेपाल भ्रमणका लागि निम्तो पनि दिएका छन्।