काठमाडौं, २५ अगस्ट २०२६ — ज्याकोले सानो ब्याट्री प्याक र कम मूल्यसहित नयाँ जे५ प्रो विद्युतीय एसयूभी नेपाली बजारमा सार्वजनिक गरेको छ।
नेपालमा ओमोडा र ज्याकोको आधिकारिक वितरक एसपीजी अटोमोबाइल्सले नाडा अटो शो २०२६ मार्फत नयाँ जे५ प्रोको बिक्री सुरु गरेको हो। कम्पनीले पहिलो १०० ग्राहकका लागि यसको प्रारम्भिक मूल्य ४७ लाख ९९ हजार रुपैयाँ तोकेको छ।
नयाँ जे५ प्रो हाल बजारमा रहेको ज्याको जे५ भन्दा ९ लाख रुपैयाँ सस्तो छ। विद्यमान जे५ को मूल्य ५६ लाख ९९ हजार रुपैयाँ छ। मूल्य घटाउन नयाँ भेरियन्टमा ब्याट्री क्षमता पनि घटाइएको छ। जे५ प्रोमा ५०.७ किलोवाट-घण्टाको ब्याट्री प्रयोग गरिएको छ भने विद्यमान जे५ मा ५८ किलोवाट-घण्टाको ब्याट्री रहेको छ।
जे५ प्रोले एकपटक पूर्ण चार्जमा ४०५ किलोमिटरसम्म यात्रा गर्न सक्ने दाबी गरिएको छ। यसमा अगाडिको पाङ्ग्रामा शक्ति पठाउने १५५ किलोवाटको विद्युतीय मोटर प्रयोग गरिएको छ, जसले अधिकतम २८८ एनएम टर्क उत्पादन गर्छ।
एसयूभीमा ८.८८ इन्चको डिजिटल इन्स्ट्रुमेन्ट क्लस्टर र १३.२ इन्चको टचस्क्रिन इन्फोटेनमेन्ट प्रणाली दिइएको छ। अन्य सुविधामा पानोरामिक ग्लास रूफ, एप्पल कारप्ले, एन्ड्रोइड अटो, ५० वाटको वायरलेस चार्जिङ, डुअल-जोन क्लाइमेट कन्ट्रोल, भेन्टिलेटेड अगाडिका सिट, पावर टेलगेट र ३६० डिग्री क्यामेरा छन्।
