मानव बेचबिखनको सम्भावित जोखिम भन्दै गड्डाचौकीबाट दुई युवती नियन्त्रणमा

कञ्चनपुर, नोभेम्बर १५, २०२६ — भारततर्फ जाँदै गरेका दुई युवतीलाई मानव बेचबिखनको सम्भावित जोखिम र उनीहरूको सुरक्षाबारे बुझ्नुपर्ने भन्दै सशस्त्र प्रहरीले कञ्चनपुरको गड्डाचौकी सीमा नाकाबाट नियन्त्रणमा लिएको छ।

नियन्त्रणमा लिइएका युवतीमा बर्दियाको मधुवन नगरपालिका–९ शान्तिटोलकी १८ वर्षीया सम्झना सुनार र १९ वर्षीया यशोदा सुनार रहेका छन्।

सशस्त्र प्रहरी बल नेपाल सीमा सुरक्षा गुल्म गड्डाचौकीको टोलीले शुक्रबार चेकजाँचका क्रममा उनीहरूलाई नियन्त्रणमा लिएको हो।

मानव बेचबिखनको सम्भावित जोखिममा पर्न सक्ने वा असुरक्षित रूपमा सीमा पार गर्न सक्ने अवस्थालाई ध्यानमा राखेर उनीहरूको सुरक्षा र अवस्थाबारे बुझ्न आवश्यक देखिएको सशस्त्र प्रहरीले जनाएको छ।

आवश्यक जाँचबुझ तथा कारबाहीका लागि दुवै युवतीलाई आफन्त नेपालकी कार्यालय संयोजक सुनिता सिनाल र इलाका प्रहरी कार्यालय गड्डाचौकीका प्रहरी नायब निरीक्षक विश्वास खत्रीको जिम्मा लगाइएको छ।

उनीहरू भारत जानुको वास्तविक कारण र मानव बेचबिखनसँग सम्बन्धित कुनै जोखिम भए नभएको विषयमा भने थप अनुसन्धान तथा पुष्टि हुन बाँकी छ।