सिन्धुलीको भिमानमा स्कुटरसँग ठोक्किएपछि ट्रकमा आगलागी, दुई जना घाइते

सिन्धुली, नोभेम्बर ६, २०२६ — सिन्धुलीको भिमानमा शुक्रबार ट्रक र स्कुटर आपसमा ठोक्किँदा ट्रकमा आगलागी भएको छ। दुर्घटनामा स्कुटरमा सवार दुई जना घाइते भएका छन् भने ट्रकमा रहेका करिब ८० प्रतिशत सामान जलेर नष्ट भएका छन्।

काठमाडौँबाट कृष्ण ट्रान्सपोर्टको सामान बोकेर इटहरीतर्फ जाँदै गरेको प्रदेश १–०२–००२–ख १२३६ नम्बरको ट्रक स्कुटरसँग ठोक्किएपछि आगलागी भएको हो।

दुर्घटनामा स्कुटरमा सवार हेमराज बख्रेल र सृजना अधिकारी घाइते भएका छन्। जिल्ला अस्पताल सिन्धुलीका अनुसार बख्रेलको स्वास्थ्य अवस्था सामान्य छ। उनलाई अस्पतालमा भर्ना गरेर उपचार भइरहेको छ। अर्की घाइते अधिकारीलाई थप उपचारका लागि काठमाडौँ पठाउने तयारी भइरहेको अस्पताल प्रशासनले जनाएको छ।

यसैबीच, प्रतिनिधिसभाअन्तर्गतको पूर्वाधार विकास समितिका सभापति आशिष गजुरेलले दुर्घटनाप्रति गम्भीर चासो व्यक्त गरेका छन्।

घटनाबारे जानकारी पाएलगत्तै उनले सम्बन्धित निकायसँग यथार्थ विवरण लिएका थिए। साथै, घटनाको आवश्यक छानबिन गरी प्रचलित कानुनअनुसार प्रक्रिया अघि बढाउन स्थानीय इलाका प्रहरी कार्यालयलाई निर्देशन दिएका छन्।

गजुरेलले जिल्ला अस्पतालका प्रमुखसँग पनि सम्पर्क गरी घाइतेहरूको स्वास्थ्य अवस्था र उपचार व्यवस्थाबारे प्रत्यक्ष जानकारी लिएका थिए।