त्रिविको निर्णयविपरीत बेतलबी बिदा जोडेर अझै पेन्सन वितरण

काठमाडौँ, नोभेम्बर ४, २०२६ — त्रिभुवन विश्वविद्यालय (त्रिवि) ले बेतलबी बिदाको अवधि सेवा अवधिमा जोडेर पेन्सन नदिने निर्णय गरे पनि यसअघि नै त्यसरी पेन्सन लिइरहेका केही प्राध्यापक तथा कर्मचारीलाई भुक्तानी जारी राखेको पाइएको छ।

बेतलबी बिदा जोडेर प्राध्यापकले पेन्सन लिइरहेको विषयमा अनलाइनखबरले २०८१ फागुनमा समाचार प्रकाशित गरेको थियो। त्यसपछि त्रिवि कार्यकारी परिषद्ले २०८२ जेठ २८ गते निर्णय नम्बर ७७७ मार्फत बेतलबी बिदाको अवधि सेवा अवधिमा गणना नगरी पेन्सन दिने निर्णय गरेको थियो।

तर, त्रिविको कर्मचारी प्रशासन महाशाखाले यसअघि नै बेतलबी बिदा जोडेर पेन्सन लिइरहेका व्यक्तिलाई अझै भुक्तानी गरिरहेको छ। महाशाखाका एक अधिकारीका अनुसार कार्यकारी परिषद्को निर्णयअघि नै पेन्सन लिइरहेकाको हकमा भुक्तानी रोकिएको छैन। नयाँ पेन्सनपट्टा बनाउन आउनेको हकमा मात्र बेतलबी बिदा जोड्ने प्रक्रिया रोकिएको छ।

त्रिविको शिक्षक तथा कर्मचारी सेवासम्बन्धी नियम, २०५० मा असाधारण अर्थात् बेतलबी बिदाको व्यवस्था छ। यस्तो बिदामा बसेको अवधिमा शिक्षक तथा कर्मचारीले तलब र भत्ता पाउँदैनन्। उक्त अवधि सेवा अवधिमा समेत गणना हुँदैन।

तर, २०६८ वैशाख ८ गतेभन्दा अगाडि बेतलबी बिदा लिएका केही शिक्षक तथा कर्मचारीको हकमा भने उक्त अवधि सेवा अवधिमा जोडेर पेन्सन गणना गरिएको छ।

यस अभ्यासको आधार त्रिविको पुनरावेदन आयोगले २०७५ असार २१ गते गरेको फैसला बनेको थियो। आयोगले आफ्नै शाखा अधिकृत विमल रिमालले लिएको बेतलबी बिदासमेत सेवा अवधिमा गणना गरी पेन्सनपट्टा जारी गरिदिने निर्णय गरेको थियो।