सिन्धुली, अक्टोबर १८, २०२६ — काठमाडौंँबाट खोटाङतर्फ जाँदै गरेको जिप सिन्धुलीको फिकल गाउँपालिका–६ मा सुनकोशी नदीमा खस्दा शनिबार बिहान तीन महिलाको मृत्यु भएको छ।
सुनकोशी प्रहरीका अनुसार को १ ज २९७६ नम्बरको उक्त जिप बिहान करिब २:३० बजे सडकबाट करिब २०० मिटर तल नदीमा खसेको थियो।
दुर्घटनापछि जिप नदीमा आंशिक रूपमा डुबेको अवस्थामा फेला परेको थियो। प्रहरीले घटनास्थलमा तीन जनाको शव फेला परेको जनाएको छ। मृतकहरूको पहिचान भने खुल्न बाँकी छ। दुर्घटनापछि बेपत्ता भएका अन्य तीन जनाको खोजी भइरहेको प्रहरीले जनाएको छ।
स्थानीय बासिन्दा राकेश पोखरेलका अनुसार चालकसहित जिपमा १० जना सवार थिए। दुर्घटनामा घाइते भएका चार जनाको उद्धार गरी उपचारका लागि सिन्धुली अस्पताल पठाइएको छ।
घाइतेमध्ये खोटाङको दिक्तेल रूपाकोट मझुवागढी नगरपालिका–३, बाम्राङकी ३८ वर्षीया सम्झना राई र उनकी १२ वर्षीया छोरी शिवानी राई रहेका छन्।
