अस्पतालबाहिर सडकमा गर्भवतीले बच्चा जन्माएको सीसीटिभी भाइरल, छानबिनको माग

राजविराज, १० सेप्टेम्बर २०२६ — सप्तरीमा एक गर्भवती महिलाले अस्पतालबाहिर सडकपेटीमै बच्चा जन्माएको देखिने सीसीटीभी फुटेज सामाजिक सञ्जालमा भाइरल बनेपछि अस्पतालले ती महिलालाई दिएको उपचार र व्यवहारबारे प्रश्न उठेको छ।

राजविराज नगरपालिका–१४ की २९ वर्षीया बबिताकुमारी पासमानले बुधबार बिहान, ९ सेप्टेम्बरमा, राजविराजस्थित गजेन्द्रनारायण सिंह अस्पतालबाहिर सडकपेटीमै छोरालाई जन्म दिएको बताइएको छ।

सप्तरीकी पत्रकार सुधा देवले बिहीबार बिहान फेसबुकमा उक्त सीसीटीभी फुटेज सार्वजनिक गर्दै पैसा तिर्न नसकेका कारण महिला अस्पतालबाहिरै सुत्केरी हुन बाध्य भएको दाबी गरेकी छन्। उनले घटनाको तत्काल छानबिन गरी दोषी देखिए कारबाही गर्न माग गरेकी छन्।

९ सेप्टेम्बरको मिति रहेको सीसीटीभी फुटेजमा बिहान २:२९ बजेदेखि ४:३५ बजेसम्मको दृश्य देखिन्छ। फुटेजमा एक पुरुष र दुई महिला सडकपेटीमा देखिन्छन्। गर्भवती महिला व्यथाले छट्पटाइरहेको देखिन्छिन्।

फुटेजअनुसार बिहान करिब ३:२७ बजेतिर उनलाई प्रसव व्यथा बढेको देखिन्छ भने करिब ४:३५ बजे उनीहरू नवजात शिशुलाई बोकेर त्यहाँबाट गएको दृश्य देखिन्छ।

तर टेकपानाले प्राप्त गरेको अस्पतालसम्बन्धी कागजातमा भने बबिता ९ सेप्टेम्बरको बिहान २:१० बजे नै गजेन्द्रनारायण सिंह अस्पतालमा भर्ना भएको देखिन्छ।

अस्पतालको लेबर चार्टमा उनको यो चौथो गर्भावस्था भएको उल्लेख छ। यसअघि उनले तीनपटक सन्तान जन्माइसकेकी थिइन्।

चिकित्सकीय विवरणअनुसार परीक्षणका क्रममा उनको पाठेघरको मुख करिब १.५ सेन्टिमिटर खुलेको थियो भने भ्रूणको मुटुको धड्कन प्रतिमिनेट १३८ पटक रहेको थियो। उपचारका लागि मञ्जुरी दिइएको कागजातमा उनका श्रीमान् हरेराम पासमानले औँठाछाप लगाएको पनि देखिन्छ।

अर्को स्वास्थ्यसम्बन्धी रिपोर्टमा बबिताले पछिल्लोपटक वडा नं. १४ स्थित स्वास्थ्य चौकीमा ३१ अगस्ट २०२६ मा स्वास्थ्य परीक्षण गराएको विवरण रहेको जनाइएको छ।

परिवार र पत्रकार सुधा देवले दिएको विवरणअनुसार सुत्केरी व्यथा लागेपछि बबिता बुधबार बिहान करिब १:३० बजे श्रीमान् र काकीसासूसँग घरबाट करिब १५ किलोमिटर टाढा रहेको अस्पताल पुगेकी थिइन्।