निजी आईएसपीले सस्ता प्याकेज बन्द गरे पनि सर्वसुलभ इन्टरनेट जारी राख्ने टेलिकमको भनाइ

काठमाडौँ, अक्टोबर ८, २०२६ — निजी इन्टरनेट सेवा प्रदायकले सुपथ मूल्य र कम गतिको इन्टरनेट प्याकेज बिक्री बन्द गर्ने निर्णय गरेपछि नेपाल दूरसञ्चार कम्पनी (नेपाल टेलिकम) ले आफूले उपलब्ध गराउँदै आएका सर्वसुलभ प्याकेज निरन्तर सञ्चालनमा रहने जनाएको छ।

इन्टरनेट सेवा प्रदायक सङ्घ नेपालले मध्यपूर्वको तनावपछि बढेको इन्धनको मूल्य, फाइबरको मूल्यवृद्धि, उच्च मुद्रास्फीति तथा कृत्रिम बौद्धिकता (एआई) को तीव्र वृद्धिका कारण इलेक्ट्रोनिक चिपसेटको मूल्य बढेको भन्दै सस्ता र कम गतिको इन्टरनेट प्याकेज बन्द गर्ने निर्णय गरेको थियो। सङ्घले बढ्दो लागतका कारण सेवा प्रदायकको सञ्चालन खर्चसमेत धान्न कठिन भएको जनाएको थियो।

सङ्घको निर्णयसँगै इन्टरनेट शुल्क महँगो हुने र न्यून आय भएका उपभोक्ता इन्टरनेट सेवाबाट वञ्चित हुन सक्ने विषयमा बहस भइरहेको छ।

नेपाल टेलिकमका प्रवक्ता डा. कमल लामिछानेले भने टेलिकमले हाल बिक्री गरिरहेका प्याकेज निरन्तर सञ्चालन गर्ने र तत्काल मूल्य बढाउने योजना नरहेको बताएका छन्।

“टेलिकमले ग्राहकलाई जुन प्याकेज बिक्री गरिरहेको छ, त्यो निरन्तर रूपमा चल्छ । अहिले मूल्य बढाउने सोच छैन, टेलिकमले ग्राहकलाई उपलब्ध गराएको प्याकेज निकै सर्वसुलभ दरको छ,” लामिछानेले राससलाई बताए।

उनका अनुसार अन्य सेवा प्रदायकको तुलनामा टेलिकमले वार्षिक र दुई वर्षका फाइबर इन्टरनेट प्याकेज सुपथ मूल्यमा बिक्री गरिरहेको छ। फाइबर इन्टरनेट प्याकेज खरिद गर्ने ग्राहकले दैनिक ६०० एमबीदेखि एक हजार एमबीसम्म मोबाइल डेटा निःशुल्क पाउने कम्पनीले जनाएको छ। एक महिने र तीन महिने प्याकेज पनि सञ्चालनमा छन्।

लामिछानेले उपभोक्ताले आफूलाई उपलब्ध गराइएको ब्यान्डविथभन्दा कम नपाउने र बिलिङ पारदर्शी रहेको बताए। दुई वर्षको प्याकेज एकैपटक खरिद गर्दा वार्षिक प्याकेजको सुविधामा झन्डै १५ प्रतिशत सहुलियत उपलब्ध गराइएको टेलिकमको दाबी छ।

टेलिकमले घरायसी ग्राहकका लागि ५० एमबिपिएस इन्टरनेटको वार्षिक शुल्क रु आठ हजार ४९९ तोकेको छ। दुई वर्षको सेवा एकैपटक लिँदा रु १४ हजार ९९९ तिर्नुपर्नेछ। वार्षिक शुल्क एकैपटक भुक्तानी गर्दा दैनिक ६०० एमबी मोबाइल डेटा निःशुल्क पाइने कम्पनीले जनाएको छ।

त्यसैगरी, ७५ एमबिपिएसका लागि वार्षिक रु १० हजार ४९९, १०० एमबिपिएसका लागि रु ११ हजार ४९९, १५० एमबिपिएसका लागि रु १२ हजार ९९९ र २०० एमबिपिएसका लागि रु १६ हजार ४९९ शुल्क तोकिएको छ। गत साउन मसान्तसम्म टेलिकमको फाइबर इन्टरनेट जडान गर्ने ग्राहकको सङ्ख्या चार लाख दुई हजार ११० पुगेको थियो।