उच्च ब्याजदर, जहाज विस्तारमा ढिलाइ र जनशक्ति अभावले नेपाल एयरलाइन्स संकटमा

काठमाडौं, अक्टोबर २, २०२६ — उच्च ब्याजदरको ऋण, जहाज विस्तारमा देखिएको ढिलाइ र प्राविधिक जनशक्ति अभावका कारण नेपाल वायुसेवा निगम (नेपाल एयरलाइन्स) संकटमा परेको निगमका निमित्त महाप्रबन्धक जनकराज कालाखेतीले बताएका छन्।

कालाखेतीले शुक्रबार प्रतिनिधिसभाअन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा यस्तो जानकारी दिएका हुन्।

निगमको सेवासुविधाप्रति असन्तुष्टि जनाउँदै हालै पाँच जना वाइडबडी क्याप्टेनले राजीनामा दिएको उनले बताए। उनीहरूको राजीनामा स्वीकृत भएमा निगमलाई वाइडबडी जहाज सञ्चालन गर्न समस्या हुने उनले बताए।

‘जनशक्ति व्यवस्थापनको अवस्था चिन्ताजनक छ। वाइडबडीका पाँच जना क्याप्टेनले राजीनामा दिएको अवस्था छ। भोलि राजीनामा स्वीकृत गर्ने हो भने वाइडबडी जहाज उडानमा समस्या हुने देखिएको छ,’ उनले भने।

विदेशी वायुसेवाले पाइलट तथा इन्जिनियरलाई तुलनात्मक रूपमा बढी पारिश्रमिक दिने भएकाले निगममा जनशक्ति टिकाउन कठिन भइरहेको कालाखेतीले बताए।

वाइडबडी जहाजको इन्जिन मर्मतका लागि आह्वान गरिएको टेन्डरमा बैंक ग्यारेन्टीसम्बन्धी जटिल प्रावधानका कारण बोलपत्रदाताले रुचि नदेखाउँदा मर्मत कार्यसमेत प्रभावित भएको उनले बताए।

ऋणको बोझले थपेको संकट

कालाखेतीका अनुसार ऋणको किस्ता र ब्याज तिर्नै कठिन भइरहेको अवस्थाले राष्ट्रिय ध्वजावाहकको व्यावसायिक भविष्य जोखिममा परेको छ।

कर्मचारी सञ्चय कोष र नागरिक लगानी कोषबाट लिइएको ऋणको ब्याजदर ९.५ देखि १०.५ प्रतिशतसम्म पुगेकाले निगममाथि ठूलो आर्थिक भार परेको उनले बताए।

पुरानो बक्यौता नतिरेसम्म ऋण पुनर्संरचना गर्न ऋणदाता निकायहरूले नमानेपछि समस्या थप जटिल बनेको उनले बताए। कोभिड–१९ को समयमा समेत लगाइएको ब्याजका कारण ऋणको भारमा ७ अर्ब रुपैयाँभन्दा बढी थपिएको उनले बताए।

‘नेपाल वायुसेवा निगमको प्रमुख समस्या उच्च ब्याजदर र ऋणको ठूलो भार हो। बजार ब्याजदर ४.५–५.५ प्रतिशतको आसपास हुँदा पनि कर्मचारी सञ्चय कोष र नागरिक लगानी कोषको ब्याजदर औसतमा करिब ९–१०.५ प्रतिशत छ,’ उनले भने, ‘पुरानो बक्यौता चुक्ता गरेपछि मात्र ब्याज पुनर्संरचना गर्ने ऋणदाताको अडान निगमको क्षमताभन्दा बाहिर छ। त्यसैले ऋण पुनर्संरचनाका लागि सरकारको सक्रिय हस्तक्षेप आवश्यक छ।’