बाटो सहज बनेसँगै घान्द्रुकमा पर्यटकको चहलपहल बढ्दै

कास्की, अक्टोबर ६, २०२६ — कास्कीको अन्नपूर्ण गाउँपालिका–१० र ११ मा पर्ने पर्यटकीय गाउँ घान्द्रुकमा सडक पहुँच सहज भएसँगै पर्यटकको आगमन बढ्न थालेको छ।

बाढीपहिरोका कारण अवरुद्ध बनेको वीरेठाँटी–घान्द्रुक सडक सञ्चालनमा आएपछि पर्यटक घान्द्रुक पुग्न थालेका हुन्।

घान्द्रुकस्थित निर्मल भिल्लाकी प्रबन्ध निर्देशक स्नेहा गुरुङले बाटो सहज भएसँगै गाउँमा पर्यटकको चहलपहल सुरु भएको बताइन्। बाढीपहिरोका कारण बाटो अवरुद्ध हुँदा घान्द्रुकको पर्यटन व्यवसाय लगभग शून्यमा पुगे पनि अब व्यवसाय चलायमान हुने आशा जागेको उनले बताइन्।

‘चाडपर्वसँगै पर्यटकको सिजन पनि सुरु भयो। बाटो पनि सहज भएको छ,’ उनले भनिन्, ‘असार, साउन र भदौमा पर्यटक शून्य नै थियो। अहिले विस्तारै आउन सुरु गरेका छन्। अब केही हुन्छ कि भन्ने आशा पलाएको छ।’

होटल रक एन्ड मुडका सञ्चालक तथा रोधी क्लब घान्द्रुकका अध्यक्ष लक्षिण गुरुङले घान्द्रुक पुग्ने बाटो सहज भएको सन्देश फैलाउन आवश्यक रहेको बताए।

‘पर्यटक आउन सुरु गरेका छन् तर अझै पनि धेरैलाई बाटो खराब छ भन्ने लागेको हुन सक्छ,’ उनले भने, ‘धेरैले घान्द्रुकको बाटो बनेको छैन भनेर योजना क्यान्सिल पनि गर्नुभएको होला। अब हामीले बाटो सहज छ, ढुक्कसँग घुम्न आउनुहोला भन्ने सन्देश प्रवाह गर्नुपर्नेछ।’

निरन्तरको वर्षाका कारण विभिन्न स्थानमा खसेका पहिरो पन्छाएर बाटो सहज बनाएपछि पर्यटक घान्द्रुक पुग्न थाले पनि सोचेजस्तो सङ्ख्या भने नभएको उनले बताए। उनका अनुसार उनको होटलमा ४५ जनासम्म राख्न सकिन्छ। अघिल्ला वर्षमा यही समयमा होटल भरिभराउ हुने गरे पनि यसपटक दैनिक पाँचदेखि सात जना मात्र आउने गरेका छन्।

घान्द्रुक पर्यटन व्यवस्थापन समितिका अध्यक्ष विक्रम गुरुङले बाटोसँगै मौसम खुलेपछि घान्द्रुकको पर्यटन व्यवसाय विस्तारै चलायमान हुँदै गएको बताए। उनका अनुसार अहिले दैनिक दुईदेखि तीन सय पर्यटक घान्द्रुक पुग्ने गरेका छन्।

‘यो बेला पर्यटक आउने समय नै हो। यही समयमा बाटो बिग्रँदा निकै चिन्ता लागेको थियो। सबैको पहलमा बाटो बनाएपछि पाहुना आउन थालेका छन्,’ उनले भने, ‘पहिला–पहिला यही समयमा बस्ने ठाउँ नपुगेर पाहुना फर्काउनुपर्ने अवस्था थियो। यो वर्ष विस्तारै बढ्ने क्रम जारी छ। अहिले दैनिक दुई–तीन सय जना आउँछन्।’

अध्यक्ष गुरुङले घान्द्रुकको बाटो सहज भएको सन्देश सबैसामु पुर्‍याउनुपर्ने बताए।