दमकल नपुग्दा दाङको हापुरे बजारमा कस्मेटिक पसल जलेर नष्ट

दाङ, अक्टोबर २९, २०२६ — दाङको बबई गाउँपालिका–५ स्थित हापुरे बजारमा बुधबार बेलुकी भएको आगलागीबाट एउटा कस्मेटिक पसल पूर्ण रूपमा नष्ट भएको छ। आगो लागेपछि दमकल नपुगेको र पसलभित्रका सबै सामान जलेर नष्ट भएको स्थानीयले बताएका छन्।

स्थानीय खिमबहादुर सोमैले सञ्चालन गर्दै आएको गौरी शृंगार पसलमा बेलुकी करिब ८ बजे आगलागी भएको थियो। विद्युत् सर्ट भएर आगो लागेको अनुमान गरिए पनि यसको कारण पुष्टि भएको छैन।

आगलागी सुरु भएको दुई घण्टाभन्दा बढी समय बितिसक्दा पनि दमकल घटनास्थलमा नपुगेपछि पसलका सबै सामान जलेको स्थानीयको भनाइ छ।

दमकल नहुँदा स्थानीयवासी, नेपाल प्रहरी र सशस्त्र प्रहरीका टोलीले बाल्टिनमा पानी बोकेर आगो निभाउने प्रयास गरेका थिए। इलाका प्रहरी कार्यालय तुलसीपुरका प्रमुख होमबहादुर पराजुलीको नेतृत्वमा प्रहरी टोली पनि घटनास्थलमा खटिएको थियो। तर आगो ठूलो भएकाले उनीहरूको प्रयास सफल हुन सकेन।

पश्चिम दाङमा आगलागी नियन्त्रणका लागि आवश्यक साधनको अभाव रहेको विषय पनि यस घटनासँगै फेरि उठेको छ। स्थानीयका अनुसार तुलसीपुर उपमहानगरपालिकासहित पश्चिम दाङका चारवटै पालिकामा अहिले सञ्चालनयोग्य दमकल छैनन्।

तुलसीपुर उपमहानगरपालिकासँग रहेको दमकलमा २०८२ भदौ २४ गते जेनजी आन्दोलनका क्रममा आगजनी भएको थियो। त्यसयता उपमहानगरपालिकाले नयाँ दमकल खरिद गर्न सकेको छैन।