क्वालालम्पुर, मलेसिया, ८ सेप्टेम्बर २०२६ — इशान पाण्डेको उत्कृष्ट ९० रनको इनिङ्सका बाबजुद नेपाल एसीसी पुरुष प्रिमियर कपमा हङकङसँग १५ रनले पराजित भएको छ।
मंगलबार क्वालालम्पुरस्थित बायुएमास ओभलमा २६२ रनको लक्ष्य पछ्याएको नेपाल ४९.१ ओभरमा २४६ रनमा अलआउट भयो।
नेपालका लागि इशान पाण्डेले सर्वाधिक ९० रन बनाए। आसिफ शेखले ४४ रन जोड्दा दीपेन्द्र सिंह ऐरीले २५, करण केसीले २१ र गुलशन झाले २० रन बनाए।
हङकङका लागि आइजाज खानले चार विकेट लिए। यासिम मुर्तजाले दुई विकेट लिँदा किन्चित देवाङ सिंह, नसरुल्ला राना र अतिक–उल–इकबालले एक–एक विकेट लिए।
यसअघि टस जितेर पहिले ब्याटिङ गरेको हङकङले निर्धारित ५० ओभरमा सात विकेट गुमाएर २६१ रन बनाएको थियो।
