ओमानलाई ८७ रनले हराउँदै नेपाल एसीसी प्रिमियर कपको फाइनलमा

सेलाङ्गोर, मलेसिया, १० सेप्टेम्बर २०२६ — ओमानलाई ८७ रनले पराजित गर्दै नेपाल एसीसी मेन्स प्रिमियर कपको फाइनलमा प्रवेश गरेको छ। बिहीबार क्वालालम्पुरस्थित बायुएमास ओभलमा भएको सेमिफाइनलमा शानदार प्रदर्शन गर्दै नेपालले उपाधि भिडन्तमा स्थान बनाएको हो।

टस हारेर पहिले ब्याटिङ गरेको नेपाल ४५.४ ओभरमा १४७ रनमा अलआउट भएको थियो। नेपालले सुरुआतमै चार विकेट ३६ रनमा गुमाएपछि दबाबमा परेको थियो। तर दीपेन्द्रसिंह ऐरी र बशिर अहमदले महत्वपूर्ण साझेदारी गर्दै नेपालको इनिङ्स सम्हाले।

दीपेन्द्रले सर्वाधिक ५१ रन बनाए भने बशिरले ४७ रनको योगदान दिए। उनीहरूको साझेदारीले नेपाललाई सम्मानजनक योगफलसम्म पुर्‍याएको थियो।

ओमानका जे ओडेड्रा र हस्नैन शाहले समान तीन–तीन विकेट लिए भने मोहम्मद इमरानले दुई विकेट लिए।

१४८ रनको लक्ष्य पछ्याएको ओमान भने नेपाली बलरसामु टिक्न सकेन। ओमान २८.१ ओभरमा केवल ६० रनमा अलआउट भयो।

ओमानका लागि जितेन्द्र सिंहले सर्वाधिक २५ रन बनाए भने जितेन रामानन्दीले १३ रन जोडे। अन्य कुनै पनि ब्याटरले दोहोरो अंकमा रन बनाउन सकेनन्।

नेपालका कप्तान सन्दीप लामिछाने र दीपेन्द्रसिंह ऐरीले समान तीन–तीन विकेट लिए। ललित राजवंशी र रोहित पौडेलले समान दुई–दुई विकेट लिए।

ओमानमाथिको यो जितसँगै नेपाल प्रतियोगिताको फाइनलमा पुगेको छ। उपाधिका लागि नेपालले संयुक्त अरब इमिरेट्स (यूएई) को सामना गर्नेछ। यूएईले अर्को सेमिफाइनलमा हङकङलाई सात विकेटले पराजित गर्दै फाइनलमा स्थान बनाएको हो।

उपाधिका लागि नेपाल र यूएईबीचको फाइनल शनिबार हुनेछ।

एसीसी मेन्स प्रिमियर कपको उपाधि नेपालका लागि थप महत्वपूर्ण छ, किनकि प्रतियोगिताको विजेताले सन् २०२७ को पुरुष एसिया कपमा स्थान बनाउनेछ। एसिया कप सन् २०२७ को जुन १८ देखि जुलाई ४ सम्म बंगलादेशमा आयोजना गर्ने योजना रहेको छ, यद्यपि यी मितिहरू औपचारिक रूपमा पुष्टि हुन बाँकी छन्।