मोरङ, अक्टोबर १, २०२६ — नेपाली कांग्रेसको १५औँ महाधिवेशनअन्तर्गत मोरङ–६ मा बुधबार दुई पक्षबीच झडप हुँदा तीन जना घाइते भएका छन्।
सुन्दरहरैँचा नगरपालिका–४ स्थित सिक्देल बन्धु समन्वय प्रतिष्ठानमा क्षेत्रीय अधिवेशनका लागि मनोनयन दर्ता गर्ने क्रममा विवाद भएपछि झडप भएको हो। जिल्ला प्रहरी कार्यालय मोरङका प्रवक्ता प्रहरी नायब उपरीक्षक मकेन्द्रकुमार मिश्रका अनुसार मनोनयन दर्ताका क्रममा भएको विवाद झडपमा परिणत भएको हो।
घटनामा क्षेत्रीय सभापतिका उम्मेदवार चुमनारायण तबदार, चेतराज रेग्मी र समुन्द्र पोखरेल घाइते भएका छन्। उनीहरूको विराटनगरस्थित नोबेल अस्पतालमा उपचार भइरहेको र अवस्था सामान्य रहेको प्रहरीले जनाएको छ।
झडपमा संलग्न व्यक्तिहरूको खोजी भइरहेको र घटनाबारे अनुसन्धान थालिएको प्रहरीले जनाएको छ। थप झडप हुन नदिन तथा स्थिति नियन्त्रणमा लिन सुरक्षाकर्मी परिचालन गरिएको थियो। मोरङका अन्य स्थानमा भइरहेका अधिवेशन भने शान्तिपूर्ण रहेको प्रहरीले जनाएको छ।
एक क्षेत्रीय प्रतिनिधिका अनुसार प्रतिनिधिको नामावलीमा एक महिलाको नाम समावेश नभएको विषयबाट विवाद सुरु भएको थियो। माइन्युट लेख्ने क्रममा ती महिलाले आफ्नो नाम नपरेको विषय उठाएपछि केही व्यक्ति कार्यक्रमस्थलमा आएर तोडफोड गरेको प्रतिनिधिले बताएका छन्।
