डीएनए खबरका प्रधानसम्पादक धिरज बस्नेत प्रहरी नियन्त्रणमा, अन्य पत्रकारमाथि पनि प्रहरीको खोजी

काठमाडौं, अक्टोबर ३१, २०२६ — डीएनए खबरका प्रधानसम्पादक धिरज बस्नेतलाई प्रहरीले शुक्रबार दिउँसो नियन्त्रणमा लिएको छ। उनलाई काठमाडौं उपत्यका अपराध अनुसन्धान कार्यालय टेकुमा बोलाइएको थियो।

त्यहाँ कार्यरत एक पत्रकारका अनुसार दिउँसो प्रहरीले बस्नेतलाई फोन गरेर उनको इसेवामा स्क्याम भएको जानकारी दिएको थियो। त्यसपछि उनी कार्यालय पुगेका थिए। तर साँझ प्रहरीले उनलाई अब त्यहीँ बस्नुपर्ने बताएको ती पत्रकारले जानकारी दिए।

‘आज दिउँसो तपाईंको इसेवा स्क्याम भएको छ भनेर काठमाडौं उपत्यका अपराध अनुसन्धान कार्यालय टेकुबाट फोन आयो,’ ती पत्रकारले भने, ‘उहाँ त्यहाँ जानुभयो तर अहिले साँझ त तपाईं यहीँ बस्नुपर्ने भयो भनेर भनेको छ।’

यसअघि प्रहरीले नेपाल प्रेसका पत्रकार विश्वमणि सुवेदीलाई पनि नियन्त्रणमा लिइसकेको छ। समाचारका विषयमा कुराकानी गर्नुपर्ने भन्दै प्रहरीले सुवेदीलाई लगेको नेपाल प्रेसले जनाएको छ।

त्यस्तै, नयाँ पत्रिकाको कार्यालयमा पत्रकार नवराज मैनालीलाई लिन आएको भन्दै प्रहरी टोली बसिरहेको छ।

मोटिभेट न्युजका शोबराज बराललाई पनि प्रहरीले नियन्त्रणमा लिएको छ।