पत्रकारमाथि प्रहरी हस्तक्षेपको कांग्रेसद्वारा भर्त्सना, पक्राउ र धरपकड रोक्न माग

काठमाडौं, अक्टोबर ३१, २०२६ — नेपाली कांग्रेसका सभापति गगनकुमार थापाले विभिन्न सञ्चारगृहमा प्रहरी प्रवेश गरी पत्रकारहरूलाई नियन्त्रणमा लिने र जनदबाबपछि मात्र रिहा गर्ने प्रवृत्तिको भर्त्सना गरेका छन्।

शुक्रबार साँझ जारी विज्ञप्तिमा थापाले यस घटनाप्रति पार्टीको गम्भीर ध्यानाकर्षण भएको जनाउँदै कानुनविपरीत हुने पक्राउ र दुर्व्यवहार बन्द गर्न सरकारसँग माग गरेका छन्।

समाचार कक्षमै प्रहरी परिचालन गरेर पत्रकारलाई पक्राउ तथा धरपकड गर्ने शैलीले शाहीकालको निरङ्कुशताको झल्को दिएको थापाले बताएका छन्। विगतमा पनि शासकमाथि प्रश्न उठ्दा सत्ता र शक्तिको दुरुपयोग गरी सञ्चार क्षेत्रमाथि हस्तक्षेप गरिएका घटना भएको उल्लेख गर्दै उनले यस्ता प्रवृत्ति पुनः दोहोरिनु लोकतन्त्रका लागि चिन्ताजनक विषय भएको बताएका छन्।

नेपाली कांग्रेस स्थापनाकालदेखि नै प्रेस स्वतन्त्रता, नागरिक अधिकार र कानुनको शासनको रक्षाका लागि निरन्तर लड्दै आएको उल्लेख गर्दै थापाले निरङ्कुश र स्वेच्छाचारी कदमविरुद्ध पार्टी उभिने बताएका छन्।

उनले स्वतन्त्र पत्रकारिता लोकतन्त्रको आधारस्तम्भ भएको र कुनै सञ्चारमाध्यम वा पत्रकारबाट गल्ती भएको भए त्यसको निरूपणका लागि प्रेस काउन्सिललगायत स्थापित कानुनी तथा संस्थागत प्रक्रिया रहेको बताएका छन्।

ती प्रक्रियालाई बेवास्ता गर्दै सञ्चारगृहमा सीधै प्रहरी हस्तक्षेप गर्नु कानुनको शासनलाई लत्याएर कानुनलाई सत्ताको औजार बनाउने प्रवृत्ति भएको उनको भनाइ छ। सञ्चारमाध्यम र पत्रकारमाथिको यस्तो कदम निन्दनीय र आपत्तिजनक रहेको भन्दै उनले नेपाली कांग्रेसले घटनाको कडा भर्त्सना गरेको बताएका छन्।