काठमाडौं, ११ सेप्टेम्बर २०२६ — प्रधानमन्त्री बालेन्द्र शाहले शुक्रबार न्युजिल्यान्डका प्रधानमन्त्री क्रिस्टोफर लक्सनसँग टेलिफोन संवाद गरेका छन्। संवादका क्रममा रसुवामा भोटेकोशी नदीमा आएको विनाशकारी बाढीपछि जारी खोज, उद्धार, राहत तथा पुनःस्थापनाका प्रयासबारे छलफल भएको छ।
प्रधानमन्त्रीको सचिवालयका अनुसार शाहले बाढीपछि सरकारले हराइरहेका विदेशी नागरिकको खोजीलाई प्राथमिकतामा राखेको जानकारी लक्सनलाई गराएका थिए। बेपत्ता विदेशी नागरिकमा न्युजिल्यान्डका पाँच नागरिक पनि रहेको उनले बताएका थिए।
शाहले बाढीपछि न्युजिल्यान्ड सरकारले उपलब्ध गराएको २० लाख न्युजिल्यान्ड डलर बराबरको मानवीय सहयोगप्रति धन्यवाद व्यक्त गरेका छन्।
नेपाल जलवायुजन्य विपद्का दृष्टिले संवेदनशील रहेको उल्लेख गर्दै शाहले अन्तर्राष्ट्रिय मञ्चमा जलवायुजन्य विपद्बाट भएको क्षति तथा नोक्सानीका लागि वित्तीय सहायता जुटाउने प्रयासमा न्युजिल्यान्ड सरकारबाट रचनात्मक सहयोगको आग्रह गरेका छन्।
वार्ताका क्रममा प्रधानमन्त्री लक्सनले नेपालमा बाढीबाट भएको विनाशप्रति न्युजिल्यान्ड सरकार र जनताका तर्फबाट दुःख व्यक्त गर्दै नेपालप्रति ऐक्यबद्धता जनाएका छन्।
