काठमाडौं, ८ सेप्टेम्बर २०२६ — नेपाल राष्ट्र बैंकले रसुवाको भोटेकोशी नदी क्षेत्रमा आएको विनाशकारी बाढीबाट प्रभावित नागरिकको उद्धार तथा राहतका लागि प्रधानमन्त्री विपद् राहत कोषमा १ करोड ३८ लाख ९९ हजार ४२५ रुपैयाँ सहयोग गरेको छ।
राष्ट्र बैंकका अधिकारी तथा कर्मचारीबाट संकलन गरिएको उक्त रकम सोमबार प्रधानमन्त्री विपद् राहत कोषमा जम्मा गरिएको हो।
गभर्नरको कार्यालयले जारी गरेको प्रेस विज्ञप्तिअनुसार गभर्नर, डेपुटी गभर्नर तथा बैंकका स्थायी र करार सेवामा कार्यरत कर्मचारीबाट सहयोग रकम संकलन गरिएको थियो।
भदौ १० गते भोटेकोशी नदी क्षेत्रमा आएको विनाशकारी बाढीबाट प्रभावित नागरिकको उद्धार तथा राहतमा सहयोग पुर्याउने उद्देश्यले उक्त आर्थिक सहायता प्रदान गरिएको राष्ट्र बैंकले जनाएको छ।
