चितवन, अक्टोबर ६, २०२६ — चितवनका उद्योगी व्यवसायीको टोलीले राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेटेर नारायणी नदी नियन्त्रण तथा बाढी र नदी कटानबाट नारायणगढ बजारको संरक्षणका लागि तत्काल पहल गर्न आग्रह गरेको छ।
उद्योग वाणिज्य संघ चितवनको टोलीले सोमबार लामिछानेलाई भेट्दै नदी कटान र बाढीका कारण नारायणगढ बजारसहित आसपासका क्षेत्र जोखिममा परेको जानकारी गराएको हो।
संघका अध्यक्ष चिरञ्जीवी सुवेदीले नारायणी नदीको दीर्घकालीन व्यवस्थापन तथा तटबन्धन निर्माण र सुदृढीकरणसहित तत्काल आवश्यक पहल गर्न लामिछानेलाई आग्रह गरिएको बताए।
चितवन क्षेत्र नं. २ का प्रतिनिधिसभा सदस्यसमेत रहेका लामिछानेलाई भेटेर टोलीले नारायणी नदी नियन्त्रण तथा नारायणगढ बजार संरक्षणका विषयमा ध्यानाकर्षण गराएको हो।
सुवेदीका अनुसार टोलीमा संघका वरिष्ठ उपाध्यक्ष राजेन्द्र ओली तथा संघका निवर्तमान अध्यक्ष एवं नेपाल उद्योग वाणिज्य महासंघका केन्द्रीय सदस्य सुमन श्रेष्ठलगायत सहभागी थिए। टोलीले नारायणी नदीबाट उत्पन्न जोखिमको तत्काल प्राविधिक अध्ययन गर्न माग गरेको थियो।
