२७ वर्षदेखि बन्द वीरगन्ज चिनी कारखाना खोल्ने सम्भावना अध्ययन गर्न कार्यदल गठन

वीरगन्ज, १८ अगस्ट २०२६ — सरकारले करिब २७ वर्षदेखि बन्द रहेको वीरगन्ज चिनी कारखाना पुनः सञ्चालन गर्न सकिने सम्भावनाबारे अध्ययन गर्न कार्यदल गठन गरेको छ।

उद्योग, वाणिज्य तथा आपूर्ति मन्त्रालयका प्रमुख डिभिजनल इन्जिनियर श्रीकान्त यादवको संयोजकत्वमा कार्यदल गठन गरिएको हो।

मन्त्रिपरिषद्को निर्णयअनुसार गठन गरिएको कार्यदलले बन्द अवस्थामा रहेको वीरगन्ज चिनी कारखानाको वर्तमान अवस्था, यसअघि सरकारले गरेका निर्णय तथा कारखाना पुनः सञ्चालनका विषयमा तयार भएका अध्ययन र प्रतिवेदनको समीक्षा गर्नेछ। साथै, कारखाना पुनः सञ्चालनका लागि आगामी दिनमा चाल्नुपर्ने कदमबारे पनि कार्यदलले सुझाव दिनेछ।

कार्यदलमा उद्योग, वाणिज्य तथा आपूर्ति मन्त्रालयका शाखा अधिकृतहरू तथा उद्योग विभागका एक प्रतिनिधि रहेका छन्।

मन्त्रालयले कार्यदललाई अध्ययन पूरा गरी प्रतिवेदन बुझाउन १५ दिनको समय दिएको छ।

अध्ययनका क्रममा कारखाना परिसरमा रहेका भवन, कारखानाको पूर्वाधार, मेसिनरी तथा स्पेयर पार्टपुर्जाको वर्तमान अवस्था मूल्यांकन गरिनेछ। साथै, ती संरचना तथा उपकरणलाई पुनः प्रयोग गर्न सकिने वा नसकिने विषयमा पनि अध्ययन हुनेछ।

वीरगन्ज चिनी कारखाना तत्कालीन सोभियत संघको सहयोगमा स्थापना भएको थियो। कारखानाको शिलान्यास तत्कालीन राजा महेन्द्रले सन् १९६२ मा गरेका थिए। त्यसपछि कम्पनी ऐन, २०२१ अन्तर्गत कारखाना स्थापना गरिएको थियो।

कारखानाले कुनै समय ठूलो परिमाणमा चिनी उत्पादन गर्दै आएको थियो। आर्थिक वर्ष २०४७/४८ मा कारखानाले सबैभन्दा बढी चिनी उत्पादन गरेको थियो। उक्त वर्ष किसानबाट खरिद गरिएको २३ लाख ९ हजार ५४८ क्विन्टल उखु प्रशोधन गरी २ लाख २ हजार ७५० क्विन्टल चिनी उत्पादन गरिएको थियो।

तर त्यसपछिका वर्षमा उत्पादनमा ठूलो गिरावट आयो। आर्थिक वर्ष २०५०/५१ मा कारखानाले ९ लाख २५ हजार क्विन्टल उखु प्रशोधन गर्दा ८५ हजार क्विन्टल मात्रै चिनी उत्पादन गरेको थियो।

सरकारले कारखानालाई निजीकरण गर्ने योजनाअन्तर्गत २०५६ साल फागुनमा बन्द गर्ने निर्णय गरेको थियो। सोही वर्ष फागुन १६ गते बसेको मन्त्रिपरिषद्को निर्णयपछि वीरगन्ज चिनी कारखाना बन्द रहँदै आएको छ।