तनहुँका विकास आयोजनालाई ७१८.५८ हेक्टर वन क्षेत्र प्रयोग गर्न अनुमति

तनहुँ, अक्टोबर २९, २०२६ — तनहुँमा सञ्चालनमा रहेका तथा निर्माणका विभिन्न चरणमा रहेका विकास आयोजनाले जलविद्युत्, विद्युत् प्रसारण लाइन, केबुलकार, रिसोर्ट र अन्य पूर्वाधार निर्माणका लागि कुल ७१८.५८ हेक्टर वन क्षेत्र प्रयोग गर्न अनुमति पाएका छन्। डिभिजन वन कार्यालयका अनुसार जिल्लाका विभिन्न आयोजनालाई उक्त वन क्षेत्र प्रयोग गर्न दिइएको हो।

डिभिजन वन कार्यालयका प्रमुख मनोज रानाभाटका अनुसार तनहुँ जलविद्युत् आयोजना, ४०० केभी विद्युत् प्रसारण लाइन, तनहुँ हाइड्रोपावरको २२० केभी प्रसारण लाइन तथा अन्य प्रसारण लाइन आयोजनाले वन क्षेत्र प्रयोग गर्न अनुमति पाएका छन्।

वन क्षेत्र प्रयोग गर्ने आयोजनाले प्रचलित व्यवस्था र सर्तअनुसार राजस्व बुझाउने, जग्गा सट्टाभर्ना गर्ने तथा क्षतिपूर्तिस्वरूप वृक्षरोपण गर्नुपर्ने व्यवस्था छ। आयोजनाअनुसार यी कामको अवस्था फरक छ। केहीले जग्गा सट्टाभर्ना गरेर वृक्षरोपण गरिरहेका छन् भने केहीले वार्षिक कबुलियती दस्तुर वा राजस्व बुझाउँदै आएका छन्। कतिपय आयोजनामा रूख छपान तथा कटानको काम पनि भइरहेको रानाभाटले बताए।

तनहुँ जलविद्युत् आयोजनाले सबैभन्दा धेरै ४१७.३४ हेक्टर वन क्षेत्र प्रयोग गर्न अनुमति पाएको छ। जिल्लाका विकास आयोजनालाई प्रयोग गर्न दिइएको वन क्षेत्रमध्ये यो सबैभन्दा ठूलो हिस्सा हो।

४०० केभी विद्युत् प्रसारण लाइन योजनाअन्तर्गत एमसिए नेपालले १४२.६६ हेक्टर वन क्षेत्र प्रयोग गर्न अनुमति पाएको छ। तनहुँ हाइड्रोपावरको २२० केभी प्रसारण लाइन आयोजनाले ९२.७३ हेक्टर वन क्षेत्र प्रयोग गर्न पाएको छ।

नेपाल विद्युत् प्राधिकरणअन्तर्गतको मध्यमस्र्याङ्दी–डुम्रे–दमौली १३२ केभी प्रसारण लाइन आयोजनाका लागि १४.८५ हेक्टर वन क्षेत्र प्रयोग गर्न दिइएको छ। उक्त आयोजनाले वार्षिक रूपमा राजस्व बुझाउँदै आएको रानाभाटले जानकारी दिए।