म्याग्दी, अक्टोबर १८, २०२६ — कालीगण्डकी क्षेत्रमा बाढी र कटानका कारण क्षति पुगेको कालीगण्डकी करिडोरअन्तर्गतको दाना–खुर्कोट २२० केभी प्रसारण लाइन पुनः सञ्चालनमा आएको छ।
प्रसारण लाइनका तीनवटा टावर भत्किएपछि म्याग्दी र मुस्ताङका सात जलविद्युत् आयोजनाबाट उत्पादित १७६ मेगावाट विद्युत् राष्ट्रिय प्रसारण प्रणालीबाट विच्छेद भएको थियो।
नेपाल विद्युत् प्राधिकरणको गण्डकी प्रदेश ग्रिड शाखाका प्रमुख रोशन खड्काका अनुसार बाढीले भत्काएका तीन टावरको ठाउँमा अस्थायी टावर निर्माण गरी तार जडान गरेपछि शनिबार राति १०:३० बजे प्रसारण लाइनमा विद्युत् प्रवाह गरिएको हो।
“नेपाल विद्युत् प्राधिकरण र कालीगण्डकी जलविद्युत् आयोजनाका प्राविधिक जनशक्ति परिचालन गरेर बाढीबाट क्षति भएको २० दिनभित्र विद्युत् राष्ट्रिय प्रणालीमा पुनः जोड्न सफल भयौँ,” खड्काले भने।
प्राधिकरणका सहायक निर्देशक सञ्जय लोहनीले क्षतिग्रस्त तीन टावरको स्थानमा क्यानडेली प्रविधि प्रयोग गरिएको अस्थायी टावर निर्माण गरी विद्युत् आपूर्ति पुनः सञ्चालन गरिएको जानकारी दिए।
