म्याग्दी, अक्टोबर १४, २०२६ — पछिल्लो झरी र बाढीले प्रसारण लाइन तथा टावरमा क्षति पुर्याएपछि अवरुद्ध भएको म्याग्दीको अन्नपूर्ण गाउँपालिका र मुस्ताङको विद्युत् आपूर्ति पुनः नियमित गरिएको छ।
असोज ८ देखि ११ गतेसम्म परेको झरीपछि कालीगण्डकी नदीमा आएको बाढीले अन्नपूर्ण गाउँपालिकाको पोखरेबगर, धिरच्याङ र दोवाको भिरकाटे क्षेत्रमा २२० केभी क्षमताको दाना–खुर्कोट प्रसारण लाइनका चारवटा टावर ढालेको थियो भने तारसमेत चुँडिएको थियो। त्यसका कारण मुस्ताङ जिल्ला र अन्नपूर्ण गाउँपालिकामा विद्युत् आपूर्ति बन्द भएको थियो।
अन्नपूर्ण गाउँपालिकाका वडा नम्बर २, ३, ४ र ५ तथा मुस्ताङ जिल्लाभर कार्यक्षेत्र रहेको नेपाल विद्युत् प्राधिकरणको तातोपानी वितरण केन्द्रका प्रमुख हेमराज चापागाईंले प्रसारण लाइनमा क्षति पुगेकाले तत्काल दाना सबस्टेसनबाट विद्युत् आपूर्ति गर्न सम्भव नभएपछि वैकल्पिक व्यवस्था गरिएको बताए।
“दाना सबस्टेसनबाट तत्काल सम्भव नहुने भएकाले मिलनचोकदेखि दाना हुँदै मुस्ताङको कोवाङसम्म रहेको ३३ केभी प्रसारण लाइनको मर्मत सकेर विद्युत् आपूर्ति गरेका छौँ,” चापागाईंले भने। उनका अनुसार मर्मतका लागि प्राधिकरणका कर्मचारी, प्राविधिक र मजदुर परिचालन गरिएको थियो।
चापागाईंले मुस्ताङमा असोज २४ गतेदेखि विद्युत् आपूर्ति सुरु गरिएको र म्याग्दीमा एक–दुई घरबाहेक अन्य सबै ठाउँमा मर्मत कार्य सकिएको बताए। विद्युत् आपूर्ति पुनः सञ्चालन भएसँगै अवरुद्ध सञ्चार सेवा पनि सञ्चालनमा आएको छ।
