देव गुरुङले सहकारीको लगानी उत्पादनमूलक क्षेत्रमा बढाउनुपर्ने बताए

काठमाडौं, सेप्टेम्बर २०, २०२६ — नेपाली कम्युनिस्ट पार्टीका नेता देव गुरुङले अधिकांश सहकारी संस्थाहरू बचत तथा ऋण परिचालनमा मात्रै केन्द्रित भएर अनुत्पादक क्षेत्रमा लगानी गर्दा समस्यामा परेको बताएका छन्।

आइतबार मनोज भट्टद्वारा लिखित पुस्तक ‘सहकारी ठगीको जालो’ विमोचन कार्यक्रममा बोल्दै गुरुङले अधिकांश सहकारीले घरजग्गामा कारोबार गर्ने गरेको बताए।

उनले नेपालमा सहकारी क्षेत्र आफ्नो मूल अवधारणाभन्दा बाहिर गएको बताउँदै करिब ६५ प्रतिशत सहकारी संस्था बचत तथा ऋण कारोबारमा मात्रै केन्द्रित भएको दाबी गरे।

सहकारी माइक्रोफाइनान्स वा अर्धबैंकिङ मोडलमा केन्द्रित हुँदा उत्पादनमूलक क्षेत्रमा लगानी कमजोर बनेको उनको भनाइ छ।

उनले सहकारीले उत्पादनमूलक क्षेत्रमा लगानी बढाउनुपर्नेमा जोड दिँदै हाल सहकारीको लगानी कृषि, घरेलु तथा औद्योगिक उत्पादनमा पर्याप्त रूपमा केन्द्रित हुन नसकेको बताए।

गुरुङले कुल सहकारी ऋण लगानीको करिब ४० देखि ५० प्रतिशत घरजग्गामा गएको दाबी गरे। घरजग्गामा भएको लगानी अनुत्पादक लगानी रहेको उनको भनाइ छ। उनले कृषि उत्पादनमा मुस्किलले १० देखि १५ प्रतिशत मात्रै लगानी भएको बताए।

उनका अनुसार करिब ३० देखि ३५ प्रतिशत लगानी सेवामुखी क्षेत्रमा गएको छ भने औद्योगिक क्षेत्रमा सहकारीको लगानी करिब ०.८५ प्रतिशत मात्रै रहेको छ।

उत्पादनमा आधारित सहकारी विकासका लागि राज्यले सहकारीले उत्पादन गरेका वस्तुको बजार सुनिश्चित गर्नुपर्ने उनले बताए।