म्याग्डेबर्ग, जर्मनी, ७ सेप्टेम्बर २०२६ — जर्मनीको स्याक्सोनी–आनहाल्ट राज्यमा आइतबार भएको चुनावमा दक्षिणपन्थी अल्टरनेटिभ फर जर्मनी (एएफडी) पार्टी पहिलो स्थानमा आएको छ। एक्जिट पोलअनुसार प्राप्त नतिजाले उक्त पार्टीलाई राज्यस्तरमा पहिलोपटक सरकारको नेतृत्व नजिक पुर्याएको छ।
एक्जिट पोलअनुसार एएफडीले ४४ प्रतिशत मत प्राप्त गरेको छ। पार्टीले स्पष्ट बहुमत भने हासिल गर्न सकेन। यो नतिजालाई जर्मन चान्सलर फ्रेडरिक मर्जको कन्जरभेटिभ राजनीतिक धारका लागि ठूलो झट्काका रूपमा हेरिएको छ।
मतगणना जारी रहँदा एएफडीले राज्य सरकार गठन गर्न सक्ने वा नसक्ने विषय भने अझै स्पष्ट भइसकेको छैन। जर्मनीका प्रमुख राजनीतिक दलहरूले एएफडीसँग सहकार्य नगर्ने नीति अपनाउँदै आएका छन्।
जर्मन प्रसारक जेडडीएफका अनुसार चुनावमा करिब ७७ प्रतिशत मतदाता सहभागी भएका थिए।
स्याक्सोनी–आनहाल्टमा एएफडीका प्रमुख उम्मेदवार ३५ वर्षीय उलरिख सिगमन्डले नतिजालाई ऐतिहासिक उपलब्धि बताएका छन्। उनले राज्यको चुनावी सफलता आगामी दिनमा राष्ट्रिय राजनीतिमा पार्टीको प्रभाव विस्तार गर्ने दिशामा महत्वपूर्ण कदम भएको बताएका छन्।
