सियोल, दक्षिण कोरिया, सेप्टेम्बर २८, २०२६ — दुई उत्तर कोरियाली युद्धबन्दीलाई सियोल पठाइएको विषय सार्वजनिक गरेको भन्दै दक्षिण कोरियाले युक्रेनसँग औपचारिक स्पष्टीकरण र माफी मागेको छ। सियोलले यो विषय गोप्य राख्ने सहमति युक्रेनले उल्लंघन गरेको जनाएको छ।
यो विवाद युक्रेनी राष्ट्रपति भोलोदिमिर जेलेन्स्कीले गत साता संयुक्त राष्ट्रसंघको महासभालाई सम्बोधन गर्दै युक्रेनले दुई उत्तर कोरियाली सैनिकलाई हालै दक्षिण कोरिया पठाएको सार्वजनिक गरेपछि सुरु भएको हो। उनले ती सैनिकहरू रुसका पक्षमा युद्ध गरिरहेका बेला पक्राउ परेको र उनीहरूलाई जीवित पक्राउ गर्न कठिन भएको बताएका थिए।
त्यसपछि दक्षिण कोरियाका राष्ट्रपति ली जे म्युङले उक्त जानकारी सार्वजनिक गर्नु सियोल र किभबीच भएको गोपनीयता कायम राख्ने सहमतिको उल्लंघन भएको बताएका थिए। लीले एक्समा लेखेका थिए, “युक्रेनी पक्षले किन सहमति तोडेर यो विषय सार्वजनिक गर्यो मलाई थाहा छैन, तर यो निकै निराशाजनक छ।”
आइतबार दक्षिण कोरियाली राष्ट्रपतिको कार्यालयका वरिष्ठ जनसम्पर्क सचिव सियोङ गी–होङले युक्रेनले एकतर्फी रूपमा हस्तान्तरणको जानकारी सार्वजनिक गरेको र त्यसपछि गोपनीयता सम्बन्धी सहमति नभएको दाबी गरेकोमा कडा असन्तुष्टि जनाए। सियोलले आवश्यक परे थप कदम चाल्ने बताउँदै युक्रेनसँग औपचारिक स्पष्टीकरण र माफी मागेको छ।
युक्रेनले भने दक्षिण कोरियाले गरेको सहमतिको व्याख्यामा आपत्ति जनाएको छ। जेलेन्स्कीका सहयोगी दिमित्रो लित्भिनले राष्ट्रपतिले सैनिकहरू दक्षिण कोरियालाई हस्तान्तरण गरिएको तथ्य मात्र सार्वजनिक गरेको बताएका छन्। उनले युक्रेन खुला मुलुक भएकाले यस्तो हस्तान्तरण गोप्य रूपमा गर्नु असामान्य हुने तर्क गरेका छन्।
